Trans-Adriatik qaz xətti (TAP) artıq İtaliyanı yeni qaz mənbəyi ilə təmin edir və tələbatının 14 faizdən çoxunu qarşılayır.

Trend-in məlumatına görə, bunu TAP konsorsiumunun icraçı direktoru Luka Skyeppati deyib.

O qeyd edib ki, İtaliyanın TAP vasitəsilə qaz tədarükü ötən illə müqayisədə 60 faizdən çox artıb.

"Biz Avropa, o cümlədən, İtaliyaya əlavə qaz həcmləri təklif etmək üçün Cənub Qaz Dəhlizi üzrə tərəfdaşlarımızla birgə nəql gücünün 20 milyard kubmetrədək artırılması planlarına sadiqik", - deyə o bildirib.

Skyeppatinin sözlərinə görə, nəql gücünün genişləndirilməsi 2027-ci ilin sonunadək baş verəcək.

"Bu, yeni borular döşəmədən və İtaliya ərazisində əlavə işlər üçün zərurət olmadan mümkün olacaq. Bunun üçün sadəcə Yunanıstan və Albaniyada yeni kompressorların quraşdırılması kifayət edəcək", - L.Skyeppati deyib.