Azərbaycanda qabaqcıl təşviqlərin tətbiqi, dövlət–özəl tərəfdaşlıq mexanizmləri və həyata keçirilən islahatlar nəticəsində özəl sektorun iqtisadiyyatda payı 81,4%-dir.

“APA-Economics” xəbər verir ki, bunu “Dayaq mükafatı”nın təqdim olunması mərasimində çıxışı zamanı iqtisadiyyat nazirinin müavini Elnur Əliyev deyib.

O qeyd edib ki, bu ilin ilk 9 ayında Azərbaycan iqtisadiyyatına qoyulan birbaşa xarici investisiyaların həcmi 4,7 milyard ABŞ dollarından çox olub:

“Bu da ötən illə müqayisədə təqribən 5% çoxdur. Bu ilin 11 ayı ərzində özəl sektor tərəfindən qeyri-neft sektoru üzrə investisiyalar təqribən 17% artaraq 4,2 milyard manata yaxın olub. Ölkəmizdə xarici mənbələrdən investisiya yatırımları artıb. Təkcə bu ilin yanvar–noyabr aylarında əsas kapitala xarici mənbələrdən yatırılan investisiyalar ötən ilin eyni dövrü ilə müqayisədə 27% artıb.

Xüsusilə sənayenin inkişafı ölkə iqtisadiyyatının rəqabət qabiliyyətinin artırılması baxımından prioritet təşkil edir. Bu ilin 11 ayı ərzində sənaye istehsalımızın 70%-dən çoxu özəl sektorun payına düşüb.

Ölkəmizdə inklüziv sahibkarlığın inkişafı qadınların biznes təşəbbüslərinin həyata keçirilməsinə şərait yaradıb. Bunun nəticəsidir ki, bu ilin 9 ayı ərzində qadın sahibkarlarımızın sayı artaraq 339 minə yaxınlaşıb”.