Pilotsuz uçuş aparatlarının uğurlu istifadəsi Azərbaycanın ikinci Qarabağ müharibəsində qələbəsinin həlledici amili oldu.

Trend-in məlumatına görə, bu barədə ABŞ-ın “The Atlantic” jurnalında dərc olunan məqalədə deyilir.

Müəllif yazır ki, Birinci Dünya müharibəsi tankların məhdud istifadəsi, İkinci Dünya müharibəsi isə onların genişmiqyaslı istifadəsi ilə yadda qalıb. 44 günlük Qarabağ müharibəsi isə digər texniki yeniliklərin istifadəsi ilə yanaşı Azərbaycanın dronlardan səmərəli istifadə ilə tarixə düşüb.

Eyni zamanda “The Washington Post” qəzetində dərc olunan digər məqalədə qeyd olunur ki, pilotsuz uçuş aparatları bir çox müharibələrdə dəfələrlə tətbiq olunub.

Müəllif qeyd edir ki, PUA-lar 2020-ci ildə Azərbaycanın Ermənistan üzərində qələbəsində vacib rol oynayıb.

“İkinci Qarabağ müharibəsi zamanı Azərbaycan PUA-ları kəşfiyyat, artilleriya və raket bölmələrinin hədəflərinə yönəltmə, operativ vəziyyətin ümumi görüntüsünün əldə olunması üçün istifadə edirdi. Dronlardan əldə olunan məlumatların koordinasiyasının parlaq nümunəsi kimi erməni qoşunlarının Xocavənddə istifadə etdikləri hava hücumundan müdafiə sisteminin dəqiq zərbə ilə məhv edilməsini qeyd etmək olar”, - məqalədə deyilir.

Məqalədə, həmçinin vurğulanır ki, Azərbaycan taktiki silah hesab olunan pilotsuz uçuş aparatlarını operativ və strateji səviyyədə səmərəli istifadə edib.