Təbrizli dağçı Əmir Səfəri 16 avqustdan İranın ən hündür zirvəsi olan Dəmavəndə qalxan zaman itkin düşüb.

Gunaz.tv

Bu barədə yerli media məlumat yayıb.

Bildirilib ki, Əmir səfərinin həyat yoldaşı Süməyyə Süleymani zirvəyə qalxdıqları zaman 4000 metr hündürlükdə yıxılaraq yaralanıb.

Əmir Səfəri yardım çağırmaq üçün həyat yoldaşından ayrılıb, bir gün sonra Süməyyə Süleymani xilasetmə qrupu tərəfindən tapılsa da Əmir Səfərini tapmaq mümkün olmayıb.

Onun anası video müraciət yayaraq, əlaqədar dövlət qurumlarını günahlandırıb və azərbaycanlı dağçılardan oğlunu tapmaq üçün yardım istəyib.

Qızıl Aypara Cəmiyyəti və başqa əlaqədar dövlət qurumları hava şərayitinin pis və dumanlı olması səbəbindən axtarış-xilasetmə əməliyyatlarının gecikdiyini bildiriblər.

Qeyd edək ki, İranın şimalında, Mazəndəran əyalətində yerləşən Əlbürz dağının Dəmavənd qülləsi 5609 metrdir.