Vətəndaşlıq Qeydiyyatı İdarəsinin rəsmiləri Tohid Maknətinin yeni doğulmuş körpəsinə “Türkay” adını qoymaqdan imtina edib və 4 ay müddətində uşağı şəxsiyyət vəsiqəsi olmadan saxladıqdan sonra ona başqa adla doğum haqqında şəhadətnamə veriblər.

Gunaz.tv

Bu barədə Maknəti ailəsinə yaxın mənbə Balamın Adı kampaniyasına danışıb:

“Körpə 2022-cü il sentyabrın 1-də dünyaya gəlib və valideynləri onun üçün Türkay adını seçiblər. Amma Salmas Vətəndaşlıq Qeydiyyatı İdarəsinin əməkdaşları bu adın “qadağan olunmuş adlar” arasında olduğunu və ona doğum haqqında şəhadətnamə verməyəcəklərini bildiriblər. Vətəndaşlıq qeydiyyatı şöbəsində törədilən təxribat nəticəsində uşaq 4 ay şəxsiyyət vəsiqəsi olmadan qalıb. Bu müddət ərzində valideynlər açıq bazar qiymətinə süd tozu almağa məcbur olublar və onlar tibbi sığortadan məhrum olduqları üçün uşağın müalicə xərclərini özləri ödəməli olublar. Uşağın doğum haqqında şəhadətnaməsi olmadığına görə yaranan problemlərə səbəbindən valideynləri sonda ona Alpay adı ilə doğum haqqında şəhadətnamə almaq məcburiyyətində qalıblar.” - deyə məlumatda bildirilib.

Qeyd edək ki, 2021-cü ildə Cavad İmaminin ailəsi 8 aylıq hüquqi mübarizədən sonra 2022-ci ildə, bir Təbrizi ailə isə 4 aylıq hüquqi mübahisədən sonra, başqa bir Təbrizli ailə isə 2023-cü ildə bir il davam edən mübarizədən sonra "Türkay" adına doğum haqqında şəhadətnamə ala bilmişdilər. Bütün bunlara baxmayaraq, "Türkay" adı “icazə verilən adlar siyahısı”na daxil edilməmişdir.