Rəştdə yaşayan Nemət Abbasi, azərbaycanlı vəkil Əsgər Məhəmmədinin köməkliyi ilə, 63 gün davam edən hüquqi çəkişmədən sonra Vətəndaşlıq Qeydiyyatı İdarəsini Sevgi adlı qızına doğum haqqında şəhadətnamə verməyə məcbur edib.

Gunaz.tv

Bu barədə Nemət Abbasi Balamın Adı kampaniyasına danışıb.

"Qızımız 2024-cü il dekabrın 31-də doğuldu və mən həyat yoldaşımla onun üçün Sevgi adını seçdik. Rəşt Vətəndaşlıq İdarəsinin rəsmiləri bu adın Seçim Sistemində mövcud olmadığı üçün doğum haqqında şəhadətnamə verilməyəcəyini açıqladılar. Biz nə qədər türk olduğumuzu və bu adın türk adı olduğunu desək də, onlar bunu qəbul etmədilər. Biz sistemdə Sevgi adının olduğunu sübut edərək onlara etiraz etdik, ancaq Tehranda yerləşən 7 nəfərlik ad seçim komissiyası bizim etirazımızı rədd etdi və bu türk adının qeydiyyata alınmasına qarşı çıxdı. Bundan sonra biz Azərbaycanlı hüquqşünas cənab Əsgər Məhəmmədinin köməkliyi ilə məhkəməyə şikayət verməklə hüququmuzu həyata keçirdik."

Məhkəmə qərarının bir hissəsində deyilir: “Uşağın adının qadağan olunmuş ad olmadığını və bu adla doğum haqqında şəhadətnamənin əvvəllər Şərqi Azərbaycan vilayətində verildiyini nəzərə alaraq ədalət tərəzisi yeni doğulan körpənin valideynlərinin xeyrinə dönməlidir."

Xatırladaq ki, Vətəndaş Qeydiyyatı Təşkilatının türk adlarına qarşı çıxma taktikalarından biri də türk adlarını “qadağan olunmuş adlar siyahısı”ndan çıxarmamaqdır.