Rusiya hərbi bazasının Ermənistandan çıxarılması Moskva-İrəvan dialoqunda heç vaxt qaldırılmayıb.

APA-nın Moskva bürosu xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bu günkü brifinqdə bildirib.

Onun sözlərinə görə, iki ölkə arasında problemli məsələlər olsa da, Rusiya hərbi bazasının Ermənistandan çıxarılması məsələsi qaldırılmayıb.

“Bizim Ermənistanla əməkdaşlığımızın çox geniş spektri var. Sözsüz ki, bizim də hər hansı ölkələr arasında olduğu kimi problemli məsələlələrimiz var. Şübhəsiz ki, münasibətlərimizin öz problematikası, öz dramaturgiyası mövcuddur. Bizim İrəvanla bütün qurumların xətti ilə müntəzəm dialoqumuz var. Ermənistandakı Rusiya hərbi bazasının çıxarılması məsələsi praktiki olaraq heç vaxt qaldırılımayıb. Ola bilsin ki, bu məsələ daxild (Ermənistanda-red.) cəmiyyətdə, ekspert dairələrində müzakirə olunub. Bu, başqa məsələdir. Lakin bizim İrəvanla qarşılıqlı fəaliyyətimizdə bu məsələ qaldırılmayıb”, - Rusiya XİN sözçüsü qeyd edib.