Ukraynanın xarici işlər naziri Andrey Sibiqa Aİ-nin xarici işlər və təhlükəsizlik siyasəti üzrə ali nümayəndəsi Kaya Kallasla telefon danışığı aparıb.

Bu barədə Sibiqa özünün “X” hesabında məlumat verib.

O bildirib ki, bu gün Ukrayna-Rumıniya-Moldova üçlüyünün Ukraynanın Çernivtsi şəhərində nazirlər səviyyəsində görüşü keçiriləcək.

Sibiqanın sözlərinə görə, “Lublin üçbucağı” ölkələrinin (Ukrayna, Polşa və Litva) xarici işlər nazirləri konfransa onlayn qoşulacaq.

Ukrayna XİN rəhbəri Qara Dəniz və Baltik regionunun təhlükəsizliyinin bir-birinə bağlı olduğunu qeyd edib.

Andrey Sibiqa Kallasla telefon söhbətində Ukraynanın Mərkəzi və Şərqi Avropada regional formatların gücləndirilməsini dəstəklədiyini bəyan edib.

Bu konteksdə Ukrayna və Avropa ölkələrinin diplomatik koordinasiyası müzakirə olunub.