Türkiyədə səfərdə olan Macarıstanın Baş naziri Viktor Orban Rusiyadan təbii qazın alınması məsələsində Türkiyə Prezidenti Rəcəb Tayyib Ərdoğanın təminat verdiyini bildirib.

APA-nın Türkiyə bürosunun məlumatına görə, Orban deyib ki, Macarıstanın Rusiyadan təbii qaz tədarükündə Türkiyə mühüm rol oynayır.

“Ruslar bizə təbii qaz verəcək, bununla bağlı Ərdoğan təminat verdi. Buna görə ona təşəkkür edirəm”,- o deyib.

Baş nazir həmçinin Macarıstanın Türk Dövlətləri Təşkilatına dəvət olunmasında və iki ölkə arasında əlaqələrin inkişafında Ərdoğanın xüsusi rol oynadığını vurğulayıb.

Orban əlavə edib ki, iki ölkə arasında ticarət dövriyyəsi əvvəlki 2,5 milyard dollardan 6 milyard dollara yüksəlib və hədəf 10 milyard dollara çatmaqdır.