ABŞ Prezidenti Donald Tramp Burkina-Faso, Mali, Niger, Cənubi Sudan və Suriyanı vətəndaşlarının Birləşmiş Ştatlara girişi qadağan edilən ölkələrin siyahısına salıb.

AZƏRTAC xəbər verir ki, Ağ Ev, həmçinin Fələstinin hakimiyyət orqanları tərəfindən verilmiş sənədlərə sahib olan şəxslərin də ölkəyə girişini tam qadağan edib.

Bu addım səyahətçilər və immiqrantların ABŞ-a giriş standartlarını sərtləşdirmək üçün davam edən səylərin bir hissəsidir. Qərar Milli Qvardiyanın iki əsgərinin güllələnməsindən sonra verilib.

Eyni zamanda, qismən məhdudiyyətlərin tətbiq olunduğu ölkələr siyahısına daha on beş ölkə əlavə edilib. Bunlara Anqola, Antiqua və Barbuda, Benin, Kot-Divuar, Dominikan, Qabon, Qambiya, Malavi, Mavritaniya, Nigeriya, Seneqal, Tanzaniya, Tonqa, Zambiya və Zimbabve aiddir.

Donald Tramp administrasiyasının verdiyi açıqlamaya görə, vətəndaşlarının ölkəyə girişi qadağan edilmiş ölkələrin bir çoxunda “geniş yayılmış korrupsiya, saxta və ya etibarsız vəsiqələr və cinayət qeydləri” mövcuddur və bu vətəndaşlarının yoxlanılması prosesini çətinləşdirir.