ABŞ Prezidenti Donald Tramp tərəfindən yaradılmış Sülh Şurası Qəzzada vəziyyəti sabitləşdirmək və regionun müharibədən sonrakı quruluşuna hazırlaşmaq məqsədilə beynəlxalq tərəfdaşlarla, o cümlədən Aİ və Fələstin Administrasiyası ilə qeyri-rəsmi danışıqlar aparır.

Xalqcebhesi.az xəbər verir ki, bu barədə "Politico" nəşrinə müsahibəsində Norveçin xarici işlər naziri Espen Bart Eyde bildirib.

Eydenin sözlərinə görə, hazırda Amerika Sülh Şurası ilə beynəlxalq təsisatlar arasında "körpülərin salınması" prosesi gedir ki, bu da yerlərdə vəziyyətə nəzarət edən texnokratik orqan — Qəzzanın İdarə Edilməsi üzrə Milli Komitə (NCAG) ilə qarşılıqlı fəaliyyət qurmağa imkan verir.

Nazir qeyd edib ki, Tramp administrasiyasının rəsmi mövqeyi Fələstin Administrasiyası (FA) rəhbərliyini Qəzzanın idarə edilməsi planlarından uzaq tutsa da, pərdəarxası dialoq daha konstruktiv xarakter alıb. Aİ-nin diplomatiya rəhbəri Kaya Kallas Brüsseldə Fələstin Administrasiyasının Baş naziri Məhəmməd Mustafanı qəbul edərkən, Trampın Qəzza üzrə xüsusi nümayəndəsi Nikolay Mladenov da orada iştirak edib.

«Fələstin Administrasiyasının Baş naziri mənə bildirdi ki, ABŞ ilə danışıqlar daha yaxşı irəliləyir və praktiki əməkdaşlıq mövcuddur», — deyə Eyde vurğulayıb. Onun sözlərinə görə, Trampın planı islahatlar aparıldıqdan sonra FA-nın uzunmüddətli iştirakını nəzərdə tutur.

Norveç XİN başçısı həmçinin qeyd edib ki, HAMAS-ın tam tərksilah edilməsi polis və beynəlxalq sabitləşdirmə qüvvələrinin çatışmazlığı səbəbindən ləngiyir — bu strukturların yaradılması ABŞ Prezidenti tərəfindən Qəzza nizamlanmasına dair "20 bəndlik plan"da vəd edilmişdi.

Məryəm Quliyeva