“Ali məktəblərdə yekun attestasiyaya gəlincə, təxminən 80 faiz tələbə dövlət imtahanı verir. 20 faiz tələbə isə buraxılış işləri təqdim edirlər”.
Bunu bu gün Nazirlər Kabineti yanında Operativ Qərargahın təşkil etdiyi mətbuat konfransında Təhsil naziri Ceyhun Bayramov deyib.
O bildirib ki, əksər hallarda dövlət imtahanları zamanı ötən illərdə olan qiymətləndirmə əsas götürüləcək: “Ali məktəblər 4, 5, 6 il oxuyan tələbələrlə bağlı semestrlərin nəticələrinə malikdirlər. Ali məktəblər bunu əsas götürərək tələbələrin yekun attestasiyanın qiymətləndirilməsini keçirə bilərlər. Bu yekun attestasiyadan narazı qalan tələbələr ali məktəblərə müraciət edərək yenidən attestasiya imtahanından keçə bilərlər”.
Təhsil naziri qeyd edib ki, yekun attestasiyada tələbələrin ötən illərin semestrlərindəki nəticələri əsas götürüləcək.
C. Bayramov vurğulayıb ki, buraxılış işləri onlayn formada ali məktəblərə təqdim olunacaq: “Ali məktəblər buraxılış işlərinin müdafiəsini onlayn, yaxud ənənəvi formada təşkil edə bilərlər”.