“Artilleriya qoşunlarımızın arsenalında çox dəhşətli komplekslər var” Siyasət

“Artilleriya qoşunlarımızın arsenalında çox dəhşətli komplekslər var”

Üzeyir Cəfərov: " Bu dəfə heç əsgərlərinin küllərini də toplaya bilməyəcəklər"

21 sentyabrda Ermənistanda hərbi parad keçiriləcək. Ermənistanda keçiriləcək paradlarda hər zaman rus hərbi texnikalarının üstünlüyü müşahidə edilir. Bu dəfə keçiriləcək paradda da Rusiyaya aid olan "İsgəndər M" raketinin nümayiş etdiriləcəyi haqda məlumat yayılıb. Məsələ ilə bağlı hərbi ekspert Üzeyir Cəfərov Rusiya ilə Ermənistan arasında razılaşmanın olduğunu bildirib.
"Əslinə qalsa, əgər Rusiya Ermənistana "İsgəndər M" raketi satıbsa, bununla bağlı BMT-yə arayış təqdim etməli idi. Rusiya ATƏT-in Minsk qrupunun həmsədr ölkəsidir. Belə bir vəziyyətdə Rusiyanın bu addımı atması onun iç üzünü göstərərdi. Nə istəyirlər, etsinlər, istəyirlərsə, atom silahını göstərsinlər, nə olursa-olsun, Azərbaycan öz ərazi bütövlünü bərpa edəcək. Azərbaycan BMT Təhlükəsizlik Şurasının 4 məlum qətnaməsini əlində əsas tutaraq öz ərazi bütövlüyünü təmin etməlidir.
Ekspertin sözlərinə görə, Rusiyanın Ermənistana silah satmasının əsas səbəblərindən biri Azərbaycana əzələ, güc nümayişidir: "Rusiya hər zaman özünün Azərbaycana dost kimi göstərmək istəyir. Ancaq hər dəfə müşahidə edirik ki, işğalçı dövlətə ən ağır silahları verir. O silahlardan ki, ondan heç kimdə yoxdur, yalnız Rusiyanın özündədir. Rusiya ilə Ermənistan arasında olan birgə hava hücumundan müdafiə sənədinə əsasən "İsgəndər M" operativ taktiki raketi Ermənistan ərazisindədir.
Bundan əvvəllər də Ermənistanda keçirilən hərbi paradlarda Rusiya hərbi texnikası müşahidə olunurdu. Azərbaycanın ondan da güclü silahları var. Biz aprelin əvvəllərində Rusiyanın xahişlərinə görə, Ermənistanı darmadağın etmədik. Prinsip etibarı ilə biz əməliyyatları başlasaydıq, Ermənistanda ölənlərin sayı minlərlə olacaqdı. Mən buna əminəm ki, əgər Azərbaycan ordusu əməliyyatlara başlasa, ölənlərin sayı 4 rəqəmli yox, 5 rəqəmli olacaqdı".
Ekspertin fikrincə, Azərbaycanda "İsgəndər M" Operativ taktiki raketlər olmasa da, artilleriya qoşunlarımızın arsenalında çox dəhşətli komplekslər var. O komplekslərdən istifadə etsək, bu dəfə heç əsgərlərinin küllərini də toplaya bilməyəcəklər. Əgər ermənilər başqasının sözü ilə oturub-duracaqlarsa, ağıllanmayacaqlarsa, hələ çox bəlalarla üzləşəcəklər".