“Qərarı gürcü xalqı qəbul edəcək” Siyasət

“Qərarı gürcü xalqı qəbul edəcək”

Qriqol Vaşadze: "Gürcüstanın hər bir dərrakəli vətəndaşı kimi ölkəni müasir dövlətə çevirdiyinə görə Saakaşviliyə minnətdaram"

Gürcüstan prezidenti seçiləcəyim təqdirdə Mixail Saakaşviliyə Gürcüstan vətəndaşlığını qaytaracağam.
Bunu "Güc birlikdədir" siyasi blokunun prezidentliyə namizədi Qriqol Vaşadze "Deutsche Welle"yə müsahibəsində deyib.
Qriqol Vaşadze Mixail Saakaşvili ilə yanaşı, bütün siyasi məhbusları da əfv edəcəyəni bildirib: "Hüquqşünas kimi mən ədalətin bərqərar olunmasını istəyirəm və bu, belə də olacaq. Gürcüstanın üçüncü prezidenti Gürcüstanda yaşamaq hüququ əldə edəcək. Mixail Saakaşvilinin bu hüquqdan istifadə edib-etməyəcəyi onun özündən asılı olacaq".
Prezidentliyə namizəd Gürcüstanın hər bir dərrakəli vətəndaşı kimi ölkəni müasir dövlətə çevirdiyinə görə Saakaşviliyə minnətdar olduğunu qeyd edib: "Gürcüstanın hüquq-mühafizə orqanları və ya məhkəmə sisteminin Mixail Saakaşviliyə sualları varsa, o, bunlara cavab verməlidir. Əgər Saakaşvili Gürcüstanda özünün siyasi gələcəyini qurmaq istəyirsə, o zaman qərarı gürcü xalqı qəbul edəcək".
Qeyd edək ki, Gürcüstanda prezident seçkilərinin ilk turu bu il oktyabrın 28-də keçirilib. Prezidentliyə namizədlərdən heç biri səslərin 50%-dən çoxunu qazana bilməyib. Ölkə qanunvericiliyinə əsasən, prezident seçkilərinin ikinci turu dekabrın 2-dən gec olmayaraq keçirilməlidir. İkinci turda mübarizə hakim Gürcü Arzusu Partiyasının dəstəklədiyi müstəqil namizəd Salome Zurabişvili və "Güc birlikdədir" siyasi blokunun namizədi Qriqol Vaşadze arasında gedəcək.