Sahibə Qafarova: “Müxtəlif təxribatlarla problemin tezliklə həllinə maneələr yaradır”

“Avropa İttifaqı ilə tərəfdaşlıq ölkəmizin xarici siyasətinin əsas prioritetlərindən biridir”.
Bunu İsveç parlamentində (Riksdaq) "Şərq Tərəfdaşlığı" proqramının 10-cu ildönümünə həsr olunmuş "Parlament və onun üzvləri, dialoq və plüralizmin demokratiyada rolu” adlı tədbirdə çıxışı zamanı Milli Məclisin deputatı, Azərbaycanın Avronest Parlament Assambleyasında nümayəndə heyətinin rəhbəri Sahibə Qafarova deyib.
İsveç Parlamentinin spikeri Andreas Norlenin də qatıldığı tədbirdə çıxış edən Sahibə Qafarova Azərbaycan dövlətinin yürütdüyü xarici siyasətdən, beynəlxalq təşkilatlarla qurulmuş əlaqələrdən söz açıb.
Millət vəkili vurğulayıb ki, 1999-cu ildə qüvvəyə minən Azərbaycan ilə Avropa İttifaqı (Aİ) arasında Tərəfdaşlıq və Əməkdaşlıq Sazişinin uğurlu nəticələri olduğu üçün qurumla ölkəmiz siyasi dialoqa və qarşılıqlı faydalı əməkdaşlığa yeni təkan vermək məqsədilə 2017-ci ildən yeni çərçivə sazişi üzrə danışıqlara başlayıb və bu sahədə iş davam etdirilir: "Aİ ilə Azərbaycan arasındakı əlaqələrin inkişafından danışarkən dörd sahəni qeyd etmək istərdim: birincisi, daha güclü iqtisadiyyat, ikincisi, daha yaxın əlaqələrin qurulması, üçüncüsü, güclü idarəetmə və dördüncüsü, güclü cəmiyyət. Aİ Azərbaycanın ən böyük ticarət tərəfdaşı və ən böyük ixrac-idxal bazarıdır. Həm neft, həm də qeyri-neft sektorlarında Azərbaycanın ən böyük xarici investorudur".
S.Qafarova Aİ-nin, eyni zamanda, təhsil və regional inkişafa dəstək verməklə Azərbaycan iqtisadiyyatının şaxələndirilməsi proqramını dəstəklədiyini bildirib.
Nəqliyyat sahəsində həyata keçirilən layihələrdən də söz açan deputat Azərbaycanın Şimal ilə Cənubu, eləcə də Şərq ilə Qərbi birləşdirən nəqliyyat yollarının qovuşuğunda əlverişli coğrafi məkanda yerləşdiyini, bu potensialdan istifadə edərək, Bakı limanı və Bakı-Tbilisi-Qars dəmir yolu kimi mühüm infrastruktur layihələrinə sərmayə qoyduğunu vurğulayıb. Onun sözlərinə görə, Aİ bu potensialın artırılmasını dəstəkləyir və bu gün Bakı limanında azad ticarət zonasının qurulmasında iştirak edir.
Deputat Azərbaycan ilə Aİ arasında viza rejiminin sadələşdirilməsi və readmissiya barədə sazişlər, "Erasmus+" layihəsi çərçivəsində tələbə və müəllim mübadiləsi, habelə gənclərin mobillik, təlim və könüllülük mövzusunda layihələrdə iştirak etdiyini müsbət hal kimi qiymətləndirib.
Azərbaycan ilə Aİ-nin parlament səviyyəsində də əməkdaşlıq etdiyini bildirən Sahibə Qafarova parlamentlərarası əməkdaşlıq üçün digər platforma olan Avronest Parlament Assambleyasının fəaliyyətindən də söz açaraq deyib: "Avronest Parlament Assambleyası 2011-ci il mayın 3-də Brüsseldə Aİ-nin Şərq Tərəfdaşlığının parlament təsisatı olaraq yaradılıb. İldə bir dəfə təşkil olunan görüş Avropa İttifaqı ilə onun Şərq qonşuları (Azərbaycan, Gürcüstan, Moldova və Ukrayna, Ermənistan) arasında siyasi birlik və daha sıx iqtisadi inteqrasiyanı təşviq etməkdir".
Qazanılan uğurlu nəticələrə baxmayaraq, problemlərin də olduğunu bildirən Sahibə Qafarova, Ermənistan-Azərbaycan Dağlıq Qarabağ münaqişəsinin bölgədəki sabitliyə və inkişafa maneə törətdiyini qeyd edib. Onun sözlərinə görə, reallıq budur ki, Ermənistan nəinki Azərbaycan ərazilərinin işğalını davam etdirir, həm sözdə, həm də fəaliyyəti ilə sülh danışıqları prosesinə zərdə vuraraq müxtəlif təxribatlarla problemin tezliklə həllinə maneələr yaradır: "2013-cü ildə Avropa Parlamenti Avropa Qonşuluq Siyasəti ilə bağlı qətnamə qəbul edib. Sənəddə Şərq Tərəfdaşlığı proqramının iştirakçısı olan bir ölkənin proqramın digər iştirakçısının ərazisinin işğal etməsinin layihənin təməl prinsiplərini və məqsədlərini pozduğu xüsusi qeyd olunur. Ermənistan-Azərbaycan Dağlıq Qarabağ münaqişəsinin BMT Təhlükəsizlik Şurasının qətnamələrinə uyğun həll edilməsinin vacibliyi vurğulanır. Lakin Təhlükəsizlik Şurasının 822, 853, 874 və 84 nömrəli qətnamələrinə hələ də məhəl qoyulmur".
Beynəlxalq əməkdaşlıq çərçivəsində Aİ-nin bütün Şərq Tərəfdaşlığı ölkələrinin beynəlxalq səviyyədə tanınmış sərhədləri çərçivəsində ərazi bütövlüyünü dəstəklədiyini, habelə bu məsələnin bir çox sənədlərdə təsdiqini tapdığını bildirən Milli Məclisin deputatı "Şərq Tərəfdaşlığı" proqramının növbəti onilliyinin gündəliyində güclü təhlükəsizlik məsələsinə yer verilməli olduğunu diqqətə çatdırıb.
Sual-cavab formatında davam edən tədbirdə Şərq Tərəfdaşlığı layihəsi ilə bağlı fikir mübadiləsi aparılıb.