Elmar Məmmədyarov: "Azərbaycan dəfələrlə Böyük Sülh Sazişi üzərində işə başlamağa hazr olduğunu bəyan edib"

"Ermənistan beynəlxalq hüquq normalarını, prinsiplərini və BMT Nizamnaməsini kobud şəkildə pozaraq Azərbaycana qarşı hərbi təcavüz həyata keçirib. Nəticədə 20 faiz Azərbaycan torpaqları işğal altındadır, bir milyondan artıq azərbaycanlı qanlı etnik təmizləməyə məruz qalıb". APA-nın məlumatına görə, bu barədə Azərbaycanın xarici işlər naziri Elmar Məmmədyarov Rusiyada səfərdə olarkən yerli "Nezavisimaya qazeta"ya müsahibəsində deyib.
Nazir bildirib ki, bütün hüquq normalarını pozan Ermənistan Azərtbaycan ərazisində İrəvandan olan ali vəzifəli şəxslərin iştirakı ilə hərbi təlimlər keçirir: "Həmçinin işğal olunmuş əraziləri Suriya və Livandan olan qaçqınlarla doldurmaq istiqamətində cəhdlər davam edir. Bütün bu uzaqgörən olmayan addımlar və mənfi elementlər münaqişənin sülh yolu ilə həlli prosesinə maneə törədir. ATƏT-in Minsk Qrupunun həmsədr ölkələrinin başçılarının dediyi kimi, işğal və təcavüz nəticəsində yaranan status-kvo qəbuledilməzdir. Ermənistan ilk növbədə öz qoşunlarını işğal olunmuş torpaqlardan çıxarmalıdır. Bizim mövqeyimizin siyasi və hüquqi əsasında beynəlxalq hüququn norma və prinsipləri, BMT Nizamnaməsi, BMT TŞ-nin 4 qətnaməsi və digər beynəlxalq sənədlər dayanır. BMT TŞ-nin 4 qətnaməsinə əsasən Ermənistan Silahlı Qüvvələri dərhal, qeyd-şərtsiz və tam şəkildə işğal olunmuş torpaqlardan çıxarılmalıdır. Təəssüf ki, bu tələblər 20 ildir yerinə yetirilmir. Ermənistan bunlardan imtina edir".
E. Məmmədyarov ötən ilin prezidentlərin görüşü baxımından danışıqlar prosesində intensiv il olduğunu qeyd edib: "ATƏT-in Minsk Qrupunun həmsədr ölkələri dövlət başçıları qismində bu işdə aktiv iştirak ediblər. Ötən ilin avqustunda Rusiya prezidenti Vladimir Putin Soçidə Azərbaycan və Ermənistan prezidentləri arasında görüş təşkil edib. Sentyabrda ABŞ dövlət katib Con Kerri, oktyabrın sonunda isə Fransa prezidenti Fransua Olland prezidentlər arasında görüş keçirib. ATƏT-in Minsk Qrupu həmsədrlərinin Böyük Sülh Sazişi üzərində işə başlamaqla bağlı təkidli çağırışlarına baxmayaraq, proses heç cür ölü nöqtədən tərpənə bilmir. Ermənistan bütün çağırışlardan imtina edir. Azərbaycan dəfələrlə Böyük Sülh Sazişi üzərində işə başlamağa hazır olduğunu bəyan edib. Hesab edirik ki, bu münaqişənin həlli istiqamətində irəliləyiş əldə etmək üçün ATƏT-in Minsk Qrupu həmsədrləri və onların sülhyaradıcı missiyaları Ermənistanı sülhə vadar etməklə bağlı tədbirlər görməlidir. Bu günə kimi beynəlxalq nizamı pozanlara qarşı çoxsaylı bu kimi nümunələr göstərmək olar".
Nazir onu da deyib ki, Azərbaycan zəngin təcrübəsinə əsaslanaraq ilk Avropa Oyunlarını təşkil etməklə nəinki Avropada, həmçinin Avropa sərhədləri xaricində sülh, sabitlik, tərəqqi, dostluq, mədəniyyətlərarası və dinlərarası dialoqa yardım edir: "Artıq I Avropa Oyunlarının başlamasına az qalıb. Bu tədbir ilk dəfə keçiriləcək və onu yüksək səviyyədə təşkil etməyə çalışırıq".
Onun sözlərinə görə, I Avropa Oyunları kifayət qədər böyük miqyaslı tədbir olacaq: "20 idman növündə yarışlarda iştirak edəcək 6 min idmançını qəbul edəcəyik. Onları 3 mindən çox insan müşayiət edəcək. Onu da qeyd etmək istərdim ki, nəinki Moskva, regionlar da daxil olmaqla, Rusiya mətbuatından 150 nəfərin gələcəyini gözləyirik və Bakıda rusiyalı jurnalistləri, idmançıları və azarkeşləri görməkdən məmnun olacağıq".
Elmar Məmmədyarov Azərbaycanın Rusiya ilə münasibətlərinə də toxunub: "Bu gün Rusiya ilə bir çox tərəfdaşlıq münasibətlərinin sınağa çəkildiyi bir vaxtda Azərbaycanın bu ölkə ilə əlaqələri bütün sahələri əhatə edərək sürətlə inkişaf edir".
E.Məmmədyarov bildirib ki, Azərbaycan və Rusiyanın ikitərəfli münasibətlər çərçivəsində dinamik inkişaf edən əməkdaşlığı sevindirici haldır: "Bizim əlaqələrimiz qarşılıqlı hörmət və mənfəətə dayanır. Rusiya Azərbaycanın əsas ticarət tərəfdaşlarından biridir. Azərbaycan və Rusiyanın terrorizm və mütəşəkkil cinayətkarlıqla mübarizədə birgə əməkdaşlığı regionda sabitlik və təhlükəsizliyin təmin edilməsinə böyük töhfə verir. Turizm sahəsində də yaxşı inkişaf perspektivləri var. Hər il Rusiyadan Azərbaycana gələn turistlərin sayı artır. Rusiyalıların istirahəti üçün yaxşı imkanlarımız var. Coğrafi cəhətdən yaxınıq və dil əngəli yoxdur. Mədəniyyət və təhsil sahəsini də xüsusilə qeyd etmək istərdim. 13 min azərbaycanlı tələbə Rusiyanın ali təhsil ocaqlarında oxuyur. Demək olar ki, hər həftə Rusiyanın məşhur kollektivləri Azərbaycana qastrola gəlir. Qarşılıqlı səfərlərin intensivliyi, Azərbaycan mədəniyyəti və mətbəxinin təbliğatı, ölkələr arası tələbə mübadiləsi bizi yalnız sevindirir".