Türkiyə-NATO gərginliyi Dünya

Türkiyə-NATO gərginliyi

ABŞ-da müəyyən bir qrup (Pentaqon və ya CIA ola bilər, yaxud ikisi birlikdə) Türkiyəni NATO-dan çıxmağa təhrik edir.
Bu sözləri politoloq Şahin Cəfərli qeyd edib. O bildirib ki, Türkiyə 2014-cü il Nyuport (Uels) və 2016-cı il Varşava zirvələrinin qərarları əsasında NATO-nun Rusiyaya qarşı həyata keçirdiyi yeni strategiyada ("containment", "sderjivaniye") iştirak etmir:
"Türkiyə Rusiya sərhədlərində yerləşdirilən NATO batalyonlarına və Qara dənizdə Rusiyanın artan təsirinin qarşısını almaq üçün Rumıniyada yerləşdirilən briqadaya əsgər vermədi.
Deyə bilərsiniz ki, ABŞ PKK-nın Suriya qolunu dəstəkləyib silahlandırdığı halda, Türkiyə niyə onun Rusiyaya qarşı siyasətinə dəstək versin ki? Məntiqli sualdır. Amma məsələ burasındadır ki, Türkiyənin bu siyasəti ABŞ-ın Suriya kürdlərinə aktiv dəstəyindən əvvəl başlamışdı. Üstəlik, onu da unutmayın ki, Türkiyə özü ilk vaxtlarda PYD-YPG-ni terrorçu saymırdı, bu qruplaşmanın lideri Salih Müslüm azı 2 dəfə Ankaraya dəvət olunmuşdu, İŞİD Kobaniyə hücum edəndə Türkiyə kürdlərə dəstək vermişdi, eyni zamanda, Türkiyə Süleyman şahın məzarını PYD-YPG-nin dəstəyi ilə köçürmüşdü".
Politoloq qeyd edib ki, Türkiyə ABŞ-ın Suriyada kürdləri silahlandırmasından öncə baş verən Krımın ilhaqından və Donbasdakı separatizmdən sonra Rusiyaya qarşı sanksiyalara qoşulmayan yeganə NATO ölkəsi olub:
"Baxmayaraq ki, Rusiyanın Krımı ələ keçirərək Qara dənizdə güclənməsi Türkiyənin təhlükəsizliyinə təhdiddir və onun regiondakı rolunu məhdudlaşdırır. Burada Krımın Türkiyə üçün tarixi əhəmiyyəti və yerli tatar xalqı ilə qardaşlıq əlaqələrinin olduğunu da unutmaq olmaz. Türkiyə Ukraynanın tankerlərlə sıxılmış maye qaz idxal etməsinə "boğazların təhlükəsizliyi" bəhanəsi ilə icazə vermədi və indi də vermir. Türkiyə Rusiyanın Avropaya qaz ixracında əsas tranzit ölkə kimi Ukraynanın önəmini azaltmaq üçün həyata keçirdiyi layihəyə ("Türk axını") dəstək verdi. Ukraynanın bu layihənin reallaşması nəticəsində məruz qalacağı itki ildə azı yarım milyard dollar olacaq".
Politoloq vurğulayıb ki, Türkiyə daha əvvəl İrana qarşı sanksiyalara da qatılmamış, hətta bu sanksiyaları əl altından pozmuşdu:
"Türkiyə 2008-ci il Cənubi Osetiya müharibəsi zamanı ABŞ-ın Gürcüstana dəstək nümayişi kimi göndərdiyi hərbi gəmini boğazlarda ləngitmişdi. 2003-cü ildə isə ABŞ qoşunlarının öz ərazisindən keçərək İraqa girməsinə icazə verməmiş, nəticədə ABŞ ordusu cənubdan girərək həm daha çox itki vermiş, həm də əməliyyatın xərci artmışdı".
Politoloq bildirib ki, əlbəttə, Türkiyənin ABŞ-ın göstərdiyi yoldan getməli olduğunu düşünmür:
"Sadəcə faktları xatırladıram ki, bu proseslərlə maraqlanan dostlarımızda obyektiv təsəvvür yaransın, çünki Türkiyənin hovuz mediası və onları burada təkrarlayan qəzetlərimiz, saytlarımız insanlarımızda yanlış təsəvvürlər yaradır. Yəni bilin ki, müttəfiqliyə zidd addımlar atan təkcə ABŞ deyil, həm də Türkiyədir. Və münasibətlərin soyuması ABŞ-ın Suriya kürdlərini silahlandırmasından çox-çox öncə başlayıb. Hazırda baş verən proseslər göstərir ki, ABŞ-da müəyyən qrup Türkiyəyə mesaj verir ki, NATO-nun siyasətində iştirak etmirsənsə və Rusiya ilə müttəfiq olmaq istəyirsənsə, onda birdəfəlik NATO-dan çıx. Hesab-kitab aparmadan öz gündəlik, hətta anlıq emosiyalarının təsiri ilə Türkiyənin siyasətini formalaşdıran, peşəkar türk diplomatlarını "monşer" adlandıraraq bu prosesdən kənarlaşdıran impulsiv RTE, fikrimcə, məhz bu addıma təhrik edilir".
Politoloq vurğulayıb ki, amma Türkiyə qətiyyən NATO-dan çıxmamalıdır:
"Bu, ölkə üçün ağır nəticələrə səbəb ola bilər".