Gürcüstanda yeni növ koronavirus infeksiyası (COVID-19) ilə əlaqədar açıq və qapalı məkanlarda üç və daha artıq şəxsin toplaşmasına qoyulan qadağa götürülür.

APA-nın yerli bürosunun xəbərinə görə, bu barədə Gürcüstanın Baş Naziri Giorgi Qaxaria bildirib.

Onun sözlərinə görə, lakin minik avtomobillərində üç və daha artıq şəxsin daşınmasına icazə verilməyəcək.

Baş Nazir qeyd edib ki, bu gündən Gürcüstanın Rustavi şəhərinə və azərbaycanlıların yaşadığı Qardabani rayonuna giriş-çıxış qadağası ləğv edilir.

“Mayın 18-dən etibarən isə Marneuli rayonuna giriş-çıxışa tətbiq edilən məhdudiyyətlərin götürülməsi planlaşdırılır”, - deyə G. Qaxaria vurğulayıb.