Vüqar İsgəndərov: "İnsanları ifrat ehsandan inzibati qaydada yox, məhz maarifləndirmə yolu ilə çəkindirmək lazımdır"

"Hüzr mərasimlərində israfçılıq faktları aşkardır. Belə faktlar xüsusən zəngin həyat sürən insanların məclislərində daha çox olur. Həmçinin paytaxt Bakı bu sahədə bölgələri daha da üstələyib. Cəmiyyətdə sanki bir bəhs etmək yarışı yaranıb. Belə hallarla mübarizənin ancaq və ancaq təbliğat və maariflənmə yolu ilə olmasının tərəfdarıyıq".
Bunu "SalamNews"a Gəncənin "Furqan" İctimai Birliyinin sədri, ilahiyyatçı Vüqar İsgəndərov bildirib.
Onun sözlərinə görə, yemək ehsanları uzun illər ərzində formlaşmış adətlərimizdəndir. Belə adətlərlə inzibati qaydada mübarizə aparmaq ürəkaçmayan mənzərələrlə qarşılaşdıra bilər. Təsəvvür edin, çox yaxınını itirmiş vətəndaş uzaqdan gələn qohumlarına yemək vermək istərkən kimlərsə daxil olaraq bu işə əngəl olmağa cəhd edir. Bu, yaxşı hal olmaz. İfrat ehsanlardan çəkinmə kompaniyalarına yaxşı olar ki, şəhərin imkanlı və vəzifəli şəxsələri hamıdan əvvəl cəlb edilsinlər. Bu, təşviqat işində olduqca mühümdür. Yəni, zamanla və səbrlə yanaşılması mühümdür. Əks təqdirdə, yəni məqsədə çatmaq üçün kobud müdaxilələr və s. hallar baş verərsə, vətəndaşların ciddi narazılığına səbəb ola bilər. Təkrar edirəm belə neqativ hallar xüsusən cəmiyyətdə nüfuzu olan ruhani din xadimlərinin davamlı təbliğ və təşviqləri ilə mümkün ola bilər.
O deyib ki, icra hakimiyyəti başçılarının tapşırıqlarından sonra yas mərasimlərinə Mənzil İstismar İdarəsi və icra hakimiyyəti nümayəndələri gəlib hüzr sahibləri ilə ifrat ehsandan çəkinməklə bağlı fərdi danışıqlar aparacaqlar. Bu vəzifəni görəcək şəxslərin xüsusi həssaslıq, səbr, etika ilə yanaşı məclis sahibinin acısına böyük hörmət nümayiş etdirmələri olduqca vacibdir. Fərdi söhbətlərə şəhərin axundlarının da cəlb edilməsinin məqsədəuyğun ola biləcəyinə inanıram. Yəni, insanları ifrat ehsandan çəkindirmək inzibati qaydada yox, hədə-qorxu ilə yox, məhz cəmiyyətimiz üçün böyük bir iş naminə olmasına inandırmaq yönündə olmalıdır: "Ümüd edirik ki, tezliklə aidiyyəti orqanlar və şəxslər qəbristanlıqlardakı şok qiymətlərlə bağlı da təxirəsalınmaz tədbirlər görəcəklər. Qəbristanlıqlardakı qiymətlərin yüksək həddə olması cəmiyyətimizi daha çox narahat edən faktdır".