Aytən Mustafayeva: "Ermənilərə cavab olaraq çox işlər görülüb və bu işlər gələn il davam etdiriləcək"

Azərbaycan Milli Elmlər Akademiyası (AMEA) İnsan Hüquqları və Konfliktologiya İnstitutunda Milli Fəaliyyət Proqramının 2.1 bəndinin icrasına müvafiq olaraq hesabat xarakterli dəyirmi masa keçirilib.
APA-nın xəbərinə görə, İnsan Hüquqları və Konfliktologiya İnstitutunun direktoru, millət vəkili Aytən Mustafayeva çıxışında deyib ki, Milli Fəaliyyət Proqramının 2.1 bəndində Ermənistanın Azərbaycana qarşı təcavüzü nəticəsində qaçqın və məcburi köçkün düşmüş şəxslərin hüquqlarının kütləvi şəkildə pozulması, işğal nəticəsində Azərbaycanın təbii, tarixi və mədəni sərvətlərinin dağıdılması faktının dünya ictimaiyyətinə çatdırılması və onlara dəymiş zərərin Ermənistan dövləti tərəfindən ödənilməsi məqsədilə beynəlxalq təşkilatlarda işin davam etdirilməsi məsələsi əks olunub. O xatırladıb ki, gələn il ermənilər qondarma "soyqırım"ın 100 illiyini qeyd edəcəklər: "Təbii ki, onlara cavab olaraq çox işlər görülüb və bu işlər gələn ildə də davam etdiriləcək. İnstitut tərəfindən "Leyla Əliyeva: Xocalıya Ədalət (beynəlxalq erməni terroruna qarşı yeni strateji model)" adlı 3 cildlik çap olunub. Hazırda həmin kitabın rus dilinə tərcüməsi bitmək üzrədir. Qeyd etməliyəm ki, prezidentin dəstəyi ilə Nazirlər Kabineti tərəfindən bu layihəyə maliyyə dəstəyi göstərilib. Bu 3 cildlik rus, ingilis və ərəb dillərinə tərcümə ediləcək. Fevrala kimi onların da çapının başa çatması gözlənilir. Biz xüsusilə ərəb ölkələrini yaddan çıxarmamalıyıq".
Azərbaycan ərazilərinin Ermənistanın silahlı təcavüzü nəticəsində məruz qaldığı itki və tələfatların qiymətləndirilməsi üzrə işçi qrupun rəhbəri, millət vəkili Xanhüseyn Kazımlı bildirib ki, erməni yalanlarını ifşa etmək üçün kifayət qədər işlər görülür.
Tədbirin davamında müxtəlif qurumların nümayəndələri mövzu ilə bağlı fikirlərini ifadə ediblər.