Beynəlxalq birlik mina terrorunu kəskin şəkildə qınamalıdır Hadisə

Beynəlxalq birlik mina terrorunu kəskin şəkildə qınamalıdır

Dinc əhalini məqsədli şəkildə öldürmək cəhdi və bu istiqamətdə həyata keçirilən istənilən təşkilati işin bir adı var - terror! Əslində, Ermənistanın hazırda Azərbaycana qarşı həyata keçirdiyi mina terroru yenilik deyil. Bütün dünyaya məlumdur ki, Ermənistan Dağlıq Qarabağa qarşı ilk dəfə ərazi iddiaları irəli sürdüyü dövrdə də Azərbaycana qarşı yüzlərlə terror aktı törədib. Bu aksiyaların hamısının arxasında Ermənistan dövləti dayanıb. Təcavüzkar tərəf və onun havadarları unutmamalıdır ki, indi 1988-ci illər deyil. Azərbaycan özünü müdafiə etmək və istənilən təhlükəni dəf etməyə qadir qüdrətli dövlətdir.
Bu fikirləri AZƏRTAC-a açıqlamasında Türkiyə-Azərbaycan parlamentlərarası dostluq qrupunun rəhbəri Şamil Ayrım iyunun 4-də Kəlbəcər rayonunun Susuzluq kəndi ərazisində mina partlaması nəticəsində baş vermiş qanlı hadisəni şərh edərkən bildirib.
AZƏRTAC-ın müxbiri Məhərrəm İbrahimov, AzTV-nin operatoru Sirac Abışov və Kəlbəcər rayonunun Susuzluq kənd icra nümayəndəsinin müavini Arif Əliyevin minaya düşərək həlak olmaları barədə xəbərin Türkiyədə böyük kədər hissi və hiddətlə qarşılandığını ifadə edən deputat Şamil Ayrım deyib: “Təcavüzkar tərəf dərk etməlidir ki, Azərbaycan 44 günlük müharibədə rəşadətli Zəfər qazanıb və işğal faktı tarixin arxivinə qovuşub. İndi sülh və birgəyaşayış dövrüdür. Bunun üçün Azərbaycan ərazisində basdırılmış minaların xəritələri verilməlidir. Əks halda, baş verən hər bir qanlı hadisəyə görə Ermənistanın siyasi-hərbi rəhbərliyi məsuliyyət daşıyır”.
Kəlbəcərdəki qanlı hadisədə həyatlarını itirən şəhidlərə Allahdan rəhmət, ailələrinə və doğmalarına, təmsil olunduqları kollektivə səbir və dözüm, yaralılara şəfa diləyən Şamil Ayrım vurğulayıb ki, beynəlxalq birlik, o cümlədən ayrı-ayrı ölkələrin parlamentləri, jurnalist təşkilatları, insan haqlarının qorunması ilə məşğul olan qurumlar Azərbaycana qarşı qəddarcasına davam etdirilən mina terroruna qarşı biganə qalmamalıdırlar. Göstərilən biganəlik haqlı olaraq belə bir sual yaradır: Avropanın insan haqlarına dair dəyərləri niyə görünmür?