Fevralın 11-də Azərbaycan Milli Xalça Muzeyində “Orta əsrlərdə Yaxın Şərqdə gümüş böhranı və onun Şirvanşahlar dövlətinin tarixinə və sikkələrinə təsiri” adlı mühazirə keçiriləcək.

Xalça Muzeyindən AZƏRTAC-a bildirilib ki, mühazirə Azərbaycan Filateliya İttifaqı nəzdində “Filateliya və numizmatika” klubunun üzvü Rüstəm Hüseynov tərəfindən təqdim olunacaq.

O, Şərq ölkələri tarixində baş vermiş fenomen bir hadisə - “gümüş böhranı” və həmin dövrdə Şirvanşahlar dövlətinin öz sikkələrini zərb etməyə başlaması, tədricən bütün regiona böyük təsir göstərən, qonşu ölkələr üçün örnək olan müxtəlif nominallı sikkələr sisteminin yaradılması barədə təfərrüatlı məlumat verəcək.

İştirak üçün https://forms.gle/wme3DeDqKLHqv9F26 linkinə müraciət etməklə qeydiyyatdan keçmək olar.