İran İnqilab Keşikçiləri Korpusu (SEPAH) Fars körfəzində 1 milyon litrdən çox qaçaq yanacaq daşıdığı iddia edilən iki tankeri müsadirə edib, 15 nəfər xarici heyət üzvünü saxlayıb.

Xalqcebhesi.az xəbər verir ki, İran dövlət televiziyasına açıqlama verən SEPAH-ın Hərbi Dəniz Qüvvələrinin 2-ci bölgə komandanı Heydər Hüneriyan Mücərrəd məsələ ilə bağlı məlumat verib.

Mücərrəd bildirib ki, Farisi adası yaxınlığında yanacaq qaçaqmalçılığı ilə məşğul olan iki gəmi ələ keçirilib. Gəmilərdə daşınan 1 milyon litrdən artıq qaçaq yanacaq aşkar edilib və 15 nəfər xarici mürettebat üzvü saxlanılıb.

İranlı rəsmi müsadirə edilən tankerlərin bayrağı və saxlanılan şəxslərin vətəndaşlığı barədə məlumat verməyib. O əlavə edib ki, saxlanılan şəxslər hüquqi prosedurlar üçün məhkəmə orqanlarına təhvil verilib.

Məryəm Quliyeva