ABŞ-ın maliyyə naziri Skott Bessent, Tehrandan kommersiya reysləri bərpa edildiyi bir vaxtda, Vaşinqtonun sanksiya siyahılarına daxil edilmiş İran aviaşirkətləri ilə əməkdaşlıq edən biznes subyektlərinin və hökumətlərin sanksiyalara məruz qalma riski barədə xəbərdarlıq edib.

Xalqcebhesi.az -ın xəbərinə görə, ilk dəfə "The Wall Street Journal" nəşrində dərc olunan bəyanatda Bessent qeyd edib ki, bu cür aviaşirkətlərə xidmət göstərən şirkətləri ABŞ sanksiyaları çərçivəsində cərimə tədbirləri gözləyə bilər.

"Sanksiya tətbiq edilmiş İran aviaşirkətləri ilə biznes qurmaq ABŞ sanksiyalarının təsirinə düşmək riski daşıyır. Xarici hökumətlər öz yurisdiksiyalarındakı şirkətlərin bu hava gəmilərinə xidmət göstərməməsi üçün bütün zəruri tədbirləri görməlidir. Bura aviasiya yanacağının tədarükü, təyyarə daxili qidalanma, uçuş-eniş haqlarının ödənilməsi və ya texniki xidmət daxildir", — deyə o bildirib.

Bu xəbərdarlıq, son fasilələrdən sonra İranın kommersiya aviasiya fəaliyyətini bərpa etməyə başladığı bir vaxtda səslənib. Bu isə Vaşinqtonda ölkənin aviasiya sektoru ilə beynəlxalq əlaqələrin yenidən qurulması ilə bağlı narahatlıq yaradıb.

Bessent vurğulayıb ki, Birləşmiş Ştatlar Tehrana qarşı təzyiq kampaniyasını davam etdirəcək və qadağan olunmuş fəaliyyətə şərait yaradan hər hansı strukturu təqib edəcək.

"Maliyyə Nazirliyi İrana maksimum təzyiq göstərəcək və İran təşkilatlarına kömək edən və ya onlarla biznes quran istənilən üçüncü tərəfə qarşı tədbir görməkdən çəkinməyəcək", — deyə nazir əlavə edib.

Məryəm Quliyeva