İslam İnqilabı Keşikçiləri Korpusu (SEPAH) ABŞ qoşunlarının Yaxın Şərqdə yerləşdiyi məntəqələrə zərbələr endirib.

Xalqcebhesi.az xəbər verir ki, bu zərbələr ABŞ-ın İran sahillərinə endirdiyi və bir qədər əvvəl ABŞ Ordusunun Mərkəzi Komandanlığının (CENTCOM) məlumat yaydığı aviazərbələrə cavab olaraq həyata keçirilib.

"Təcavüz təkrar olunacağı təqdirdə cavabımız daha genişmiqyaslı olacaq", — deyə "Tasnim" agentliyi SEPAH-ın mətbuat xidmətinin bəyanatından sitat gətirib.

Ötən gün ABŞ aviasiyası İranın pilotsuz uçuş aparatları (PUA) və raket ambarlarına, həmçinin sahilyanı radiolokasiya stansiyalarına hücum edib. CENTCOM-dan bildiriblər ki, bu addım İran tərəfindən ticarət gəmisinin atəşə tutulmasına cavab olaraq atılıb. ABŞ Prezidenti Donald Tramp Tehranın bu hərəkətlərini tərəflər arasında iyunun ortalarında imzalanmış anlaşma memorandumunun pozulması adlandırıb.

SEPAH rəhbərliyi isə heç bir razılaşmanı pozmadıqlarını bəyan edib. İran tərəfinin iddiasına görə, cənab Trampın bəhs etdiyi sənəd Tehranın Hörmüz boğazında gəmilərin hərəkətinə nəzarət hüququnu təsbit edib. "ABŞ müxtəlif təxribatlarla bu öhdəliyi pozmağa çalışıb və buna lazımi cavab verilib", — deyə korpusdan vurğulanıb.

Məryəm Quliyeva