Azərbaycan neftinin ucuzlaşması davam edir İqtisadiyyat

Azərbaycan neftinin ucuzlaşması davam edir

Hökumət isə nikbinliyini hələ də itirməyib

Azərbaycan nefti 2 dollardan artıq ucuzlaşıb. Azərbaycan Dövlət Neft Şirkətinin marketinq və iqtisadi əməliyyatlar idarəsindən "APA-Economics"ə verilən məlumata görə, London birjasında ötən gün keçirilmiş hərraclarda "AzəriLayt" markalı neftin bir barelinin qiyməti 3,32% və ya 2,33 dollar ucuzlaşaraq 67,65 dollar olub.
Hökumət Azərbaycan neftinin ucuzlaşması ilə bağlı məsələyə reaksiya verib. Jurnalistlərə açıqlamasında maliyyə naziri Samir Şərifov deyib ki, 2014-cü ilin dövlət büdcəsinin icrası yüksək səviyyədə olacaq və böyük ehtimalla, büdcə profisit ilə icra olunacaq.
Nazir bildirib ki, qısa müddət ərzində neftin qiymətinin 40%-dən çox ucuzlaşması və xammal bazarlarında hökm sürən qeyri-sabitlik və qeyri-müəyyənlik hökumət tərəfindən də qiymətləndirilir, araşdırılır və buna uyğun olaraq müvafiq tədbirlər görüləcək.
S. Şərifov əlavə edib ki, neftin ucuzlaşmasının bilavasitə dövlət büdcəsinin gəlirlərinə bir o qədər də mənfi təsiri gözlənilmir: "Neftin qiymətinə yenidən baxılması büdcə gəlirləri üçün ən vacib məsələ deyil. Çünki, dövlət büdcəsinin gəlirləri müəyyən mənada sığortalanıb".
O, bildirib ki, neftin ucuzlaşması fonunda icmal büdcənin gəlirlərində xeyli azalma müşahidə oluna bilər: "İcmal büdcənin gəlirləri əsasən Neft Fonduna toplanan gəlirlərdən ibarətdir. Yəni, bu gəlirlərə baxdıqda biz icmal büdcənin gəlirlərində biz xeyli azalma müşahidə edəcəyik".