İran Rabitə Nazirliyinin təqaüdə çıxmış təbrizli işçiləri etiraz aksiyası keçiriblər.

Gunaz.tv

Bu barədə onlar sosial media kanallarında məlumat yayıblar.

Rabitə Nazirliyinin yerli idarəsi qarşısına toplaşan təqaüdçülər pensiyalarının artırılmamasına, vaxtında ödənilməməsinə və qanunla nəzərdə tutulmuş başqa haqlarının pozulmasına etirazlarını bildiriblər.

Bununla yanaşı Qəzvin əyalətində müflis olmuş “Rezayət Xodro” şirkətinin aldadılmış səhmdarları da etiraz aksiyası keçiriblər.

Etirazçılar əyalət valiliyinin binası qarşısında və Naderi küçəsində toplaşaraq oturaq aksiyaya əl atıblar.

Aldadılmış azərbaycanlı səhmdarlar aksiyada “Rəhbər (Xameneyi) oğurladı, hökumət dəstəklədi!” şüarı səsləndiriblər.

Qeyd edək ki, adı çəkilən avtomobil şirkəti minlərlə qəzvinlinin pulunu alsa da, illərdir onların avtomobillərini təhvil verməkdən imtina edir.

Bundan əvvəl bir neçə dəfə oxşar aksiya keçirilsə də, qəzvinlilərin nə avtomobilləri, nə də pulları qaytarılır.