“Tarixi Pirzərgər hamamı, bərpa işləri həyata keçirmək, turizm və mədəniyyət xidmətləri göstərmək üçün özəl sektora təhvil verilib”-deyə, o, bildirib.

Nadir Fəllahi aprelin 14-də tarixi hamamın təhvil verilməsi ilə bağlı müqavilənin imzalanması mərasimində bildirib ki, bu addım əyalətdə davamlı məşğulluğun yaradılmasına xidmət edəcək. O, abidənin Tarixi Abidələrin Qorunması və Bərpası Fondunun iştirakı ilə özəl sektora həvalə edildiyini deyib.

“Tarixi abidənin özəl sektor investoru binada bərpa əməliyyatları həyata keçirdikdən sonra, turistlərə və vətəndaşlara xidmət göstərəcək. Bu da eyni halda əyalətdə yeni iş yerinin açılması və vətəndaşların məmnunluğuna səbəb olacaq”-deyə, Fəllahi bidlirib.

Tarixi Pirzərgər hamamı Ərdəbilin eyni adlı küçəsində yerləşir. Hamam Qacarlar dönəmində tikilib və 8896 qeydiyyat nömrəsi ilə ölkənin mədəni irs siyahısına salınıb.

Ümumi sahəsi 2 min kvadratmetrə yaxın olan hamam Ərdəbilin ən əhəmiyyətli tarixi abidələrindən biri sayılır.

Bundan öncə ötən ilin dekabr ayında Şərqi Azərbaycan əyalətinin tarixi abidələrindən bir neçəsi, o cümlədən “Göycəbel” ,”Cananlı Karvansaray”ları və “Nasehzadə Evi” özəl sektora verilib.

Qeyd edək ki, yerli mədəniyyət və incəsənət xadimləri hökumətin bu hərəkətlərini dəfələrlə tənqid edib.

Onlar bunu hökumətin Azərbaycanın tarixi abidələrin qorunub saxlanılmasına budcə ayırmaq istəməməsi ilə əlaqələndiriblər.

Qeyd edək ki, İran hakimiyyəti Azərbaycanın tarixi abidələrinə qarşı ögey münasibət sərgiləyir.

İsfahan, Şiraz, Yəzd, Kaşan və başqa fars bölgələrinin tarixi və mədəni abidələrinin qorunub saxlanılması üçün dövlət budcəsindən yüksək məbləğdə pul ayrıldığı halda, Azərbaycan abidələrinə laqeyd yanaşılır.

Hökumətin bu siyasəti Güney Azərbaycanda türk tarixi abidələrinə qərəzli yanaşma kimi dəyərləndirilir.