"Ekstradisiya və deportasiya məsələlərinə beynəlxalq səviyyəli qanunlarda iki aspektdən yanaşılır: təhvil alan dövlət tərəfindən ölüm hökm yoxdursa və siyasi məsələ deyilsə, o zaman ekstradisiya baş tuta bilər".
Bu sözləri politoloq Arzu Nağıyev deyib. Ekspert bildirib ki, Rusiya və Ermənistan Lapşin məsələsini siyasiləşdirməkdə maraqlı görünürsə də, bu cəhdlər nəticəsiz qalacaq:
"Düşünürəm ki, Lapşin Rusiyaya heç lazım deyil, əgər o, Rusiya ərazisində tutulsaydı, Moskva onu təhvil verməyə bilərdi. Lapşin Rusiya pasportundan istifadə edib Azərbaycan ərazisinə gəlirdisə, Moskva niyə onda qərar qəbul etmirdi? Bu gün Rusiyanın icazəsi olmadan hər hansı bir vətəndaş Krıma gedə bilməz. Bütün bunlar nəzərə alınmalıdır. Bununla belə, Rusiya, İsrail və hətta Ukrayna belə məsələni siyasiləşdirsələr də, Lapşin mühakimə olunacaq. Məhkəmədən sonra hər hansı humanist addımın atılması və yaxud da onun öz cəzasını çəkməsi, bu, artıq ikinci dərəcəli məsələdir".
Politoloq deyib ki, ermənilərin inhisarında olan qurumlar bu məsələni daha çox siyasiləşdirəcəklər: "Hətta indidən çirkin kampaniayaya başlayıblar".
Ekspert hesab edir ki, bu məsələnin Rusiya-Azərbaycan münasibətlərinə heç bir təsiri olmayacaq: "Bakı və Moskva arasında yüksək səviyyədə diplomatik əlaqələr var və bu kanallar vasitəsilə hər şey həllini tapacaq. Hesab edirəm ki, bütün bu məsələlər əvvəlcədən həll olunub".
Qeyd edək ki, Qarabağa qeyri-qanuni səfər edən və Azərbaycanın ərazi bütövlüyünə şübhə yaradan təbliğatlarla məşğul olan Aleksandr Lapşin 7 fevralda Belarusdan Azərbaycana ekstradisiya olunub.