Vaşinqton və Tehran arasındakı münaqişə yaxın aylarda fərqli bir mərhələyə keçəcək.

Xalqcebhesi.az xəbər verir ki, ABŞ-nin vitse-prezidenti Cey Di Vens belə hesab edir.

"Biz gələcəyi öncədən görə bilmərik, amma düşünürəm ki, prezident bir neçə ay ərzində vəziyyətin tamamilə fərqli bir mərhələyə keçəcəyini deməkdə haqlıdır", — deyə Vens "The New York Post" qəzetinə müsahibəsində bildirib.

O izah edib ki, münaqişənin inkişafının iki mərhələsi var və "birinci mərhələ başa çatıb".

"Birinci mərhələ (İranın) nüvə proqramının məhv edilməsindən, onların adi silahlı qüvvələrinin və cəmi bir neçə il əvvəl nümayiş etdirə bildikləri gücü proyeksiyalaşdırmaq qabiliyyətinin sıradan çıxarılmasından ibarət idi", — deyə Vens qeyd edib.

Vitse-prezidentin sözlərinə görə, ikinci mərhələnin mahiyyəti "mümkün qədər böyük qlobal sabitliyi qoruyub saxlamaq" və İranın bərpa olunmasına imkan verməməkdir.

Vens vurğulayıb ki, ali baş komandan kimi yalnız ABŞ Prezidenti Donald Tramp "münaqişələrin nə vaxt başladığını və nə vaxt bitdiyini müəyyən edir". Vitse-prezident həmçinin bildirib ki, hazırda ABŞ "aqressiv əməliyyatlarda iştirak etmir".

Məryəm Quliyeva