Moskva və Vaşinqton Ukraynadakı böhranın həlli üçün səyləri davam etdirmək barədə razılığa gəliblər.

Bu barədə Rusiya Xarici İşlər naziri Sergey Lavrov Federasiya Şurasında hökumət saatında bildirib.

"Amerika tərəfinin müvafiq təkliflərinin müzakirəsi, bildiyiniz kimi, dekabrın 2-də ABŞ prezidentinin xüsusi nümayəndəsi Stiven Uitkoffun Moskvaya səfəri zamanı davam etdirilib. Bu işin davam etdirilməsi ilə bağlı razılıq əldə olunub", - Lavrov deyib.

Lavrov qeyd edib ki, Moskva ABŞ prezidenti Donald Trampın Ukraynadakı münaqişənin diplomatik yollarla həlli üçün dialoqa can atmasını yüksək qiymətləndirir. "Əsas odur ki, fundamental anlayış var ki, böhranın köklü səbəbləri aradan qaldırılmadan dayanıqlı həll mümkün deyil. Əsas səbəblər hamıya bəllidir; Rusiya Federasiyasının prezidenti Vladimir Putin onlar haqqında dəfələrlə danışıb", - XİN rəhbəri əlavə edib.

Məryəm Quliyeva