İtaliyanın müdafiə naziri Guido Crosetto bildirib ki, İtaliyanın Ərbil şəhərində yerləşən hərbi bazası raket zərbəsinə məruz qalıb.

Xalqcebhesi.az xəbər verir ki, onun sözlərinə görə, italyan hərbçilər arasında ölən və ya yaralanan yoxdur.

“Raket Ərbildəki bazamıza düşüb. İtaliya hərbi personalı arasında ölən və yaralanan yoxdur. Hamı təhlükəsizdir”, — deyə nazirin sözlərini ANSA agentliyi sitat gətirib.

İtaliyanın xarici işlər naziri Antonio Tajani isə bildirib ki, Ərbildəki italyan bazası digər ölkələrin bazalarının da yerləşdiyi kompleksin tərkibindədir.

“Zərbənin məhz italyanlara, yoxsa ümumilikdə bütün kompleksə yönəldiyini bilmirik”, — deyə o qeyd edib.

Nazirin sözlərinə görə, raketin İrandan, yoxsa İraqda fəaliyyət göstərən İrana yaxın silahlı qruplaşmalar tərəfindən buraxıldığı hələlik məlum deyil.