ABŞ hərbi qüvvələrinin İraqı tərk etməsi ilə bağlı prezident Tramp: "Bahalı və səhv qərarlarla başlanmış müharibə başa çatdı - bu qələbədir" - qeyd edərək öz sosial şəbəkə hesabında yazıb. İraq hörməti isə baş verənləri "Milli suverenliyin yeni mərhələsi" adlandırıb. Əlbəttə ki, bütün bunlardan sonra hər kəsi bir sual maraqlandırır. ABŞ çıxdı, İraq yaranmış təhlükəsizlik boşluğunu necə idarə edəcək və bundan sonra bu coğrafiyada İranın təsiri nə qədər arta bilər? Məsələ burasındadır ki, İrana bağlı bəzi İraq silahlı qrupları da ABŞ-nin çıxmasını özlərinin qələbəsi kimi qeyd edirlər. Yəni baş verənlərdən görünür ki, bütün tərəflərin məmuniyyəti açıq şəkildə ifadə olunur.

Bunu xalqcebhesi.az-a politoloq Çingiz Şahbazi deyib.

ABŞ hərbi kontingentini İraqdan çıxarıb, amma İŞİD-lə mübarizədən tamamilə çəkilmir. ABŞ və koalisiya qüvvələrinin İŞİD-ə qarşı fəaliyyətinin mərkəzi İordaniyaya keçirilir. İraqa isə təlim və kəşfiyyat sahəsində dəstəyin davam etdirilməsi nəzərdə tutulur. Bağdad oktyabrın 1-dən ölkədə yeni dövrün başladığını bildirib və baş verənləri isə suverenliyin yeni mərhələsi adlandırıb. Lakin bundan sonrakı mərhələdə ölkənin təhlükəsizliyini öz daxili qüvvələri hesabına qoruyub saxlaya biləcəkmi, sualı indi hər kəsin diqqət mərkəzindədir" - o, qeyd edib.

Politoloqun fikrincə, İranın İraqdakı təsiri, xüsusilə də İrana bağlı silahlı qruplaşmaların gələcək rolu və Kürd bölgəsində isə ABŞ-nin hava hücumlarından müdafiə imkanlarının çəkilməsi heç şübhəsiz ki, İraqın gələcəyi barədə yaxşı heç bir şey vəd etmir:

"Bu baxımdan ABŞ qüvvələrinin İraqdan çıxması hadisəsi sevinclə qarşılansa da, təhlükəsizlik boşluğu baxımından həm İraqın özündə, həm də region ölkələrində narahatlıqlar var. Bu narahatlıq İrana bağlı qrupların və İŞİD-in zəifləmiş hücrələrinin yenidən bu coğrafiyada fəallaşması ehtimalını artırır. Bu baxımdan ABŞ-in İraqda 12 illik İŞİD-lə mübarizəsi sona çatdı və son hərbiçilər İraqın şimalındakı bazadan çıxıblar. Tramp bunu ABŞ və İraq üçün qələbə adlandırıb. Və "çox bahalı cəhənnəmə ekskursiya" ifadəsi işlədib. Yəni Vaşinqton bunu uzun və bahalı müharibənin bağlanması kimi bəyan etdi.

İraq və region üçün isə təhlükəsizliyin sual altına girdiyini qeyd etmək olar".

Cavid