Ermənistan məhkəməsi Rusiyanın ORSİS silah şirkətinin qara siyahıdan çıxarılması ilə bağlı qərar verib.
Bunu “RİA Novosti” agentliyinə açıqlamasında şirkətin vəkili Aleksandr Sirunyan deyib.
Qeyd edək ki, Ermənistanın silah tədarükçülərindən olan ORSİS İrəvanın qara siyahısına Müdafiə Nazirliyinin təşkil etdiyi bir neçə milyonluq tenderdən dərhal sonra daxil edilmişdi. Belə ki, tenderdə iştirak üçün 2019-cu ilin mayında şirkətin müraciəti qəbul edilsə də, sonradan tender gözlənilmədən ləğv edilmişdi.
Ermənistan Müdafiə Nazirliyinin bu addımı şirkətin qəti etirazına səbəb olmuşdu. Bundan sonra Ermənistanın qara siyahısına daxil edilən şirkət məhkəməyə müraciət etmiş və tezliklə məsələ ilə bağlı cinayət işinin açılmasına nail olmuşdu. Üstəlik, məsələnin böyüməsi Moskvanın İrəvana nota verməsinə səbəb olmuşdu.
Bu məsələ ilə əlaqədar başqa bir məqam isə İrəvana bir neçə il ərzində silah, patron, optik cihazlar tədarük edən ORSİS-dən Müdafiə Nazirliyinin əsassız şəkildə bir neçə yüz min dollarlıq ödəniş tələb etməsi olmuşdu. Üstəlik, ORSİS məhz bununla əlaqədar Ermənistanda patron zavodu tikmək planlarının təhlükə altında olduğunu açıqlamışdı.