ABŞ Müdafiə Nazirliyi hərbi qulluqçularının arasında intiharlar sayının artımını qeydə alıb.

Bu barədə Pentaqonun illik məruzəsində deyilib.

Bildirilir ki, 2020-ci ildə 580 hərbçi intihar edib.

Məlumata əsasən, ötən il hərbi hissələrdə 384 hərbçi, o cümlədən quru qoşunlarında - 175, Hərbi Hava Qüvvələrində - 81, Hərbi Dəniz Qüvvələrində - 66 və Piyada Dəniz Qoşunu Korpusunda 62 nəfər özünə qəsd edib. Eyni zamanda Milli qvardiyanın və ehtiyatda olan döyüşçülər arasında 196 intihar qeydə alınıb.

Hesabatda deyilir: "Etiraf edirik ki, göstəricilər istənilən istiqamətdə dəyişmir və ordunun bütün bölmələrində intiharların sayını azaltmaq üçün çalışmaq niyyətimizi bir daha təsdiqləyirik".

Daha əvvəlki illərə aid statistikada 2018-ci ildə Amerikanın 541, 2019-cu ildə 498 hərbi qulluqçusunun intihar etdikləri göstərilir. İntihara sövq edən əsas amillər kimi həyatda gerçəkləşməyən ümidlər, uğursuz evlilik, maddi çətinliklər və stres kimi şəxsi problemlər göstərilir.