“Estakadaların diblərində də axtarışlar aparılacaq” Hadisə

“Estakadaların diblərində də axtarışlar aparılacaq”

Kəmaləddin Heydərov: "Təbii fəlakət nəticəsində baş vermiş texnogen qəza bizə göstərir ki, gələcəkdə daha diqqətli olmalıyıq"

Günəşli" yatağında yanğının söndürülməsi işlərinin birinci fazası başa çatıb. Dekabrın 15-də bir quyunun ağzı bağlanıb. O biri quyulardakı yanğınların ram edilməsi istiqamətində işlər gedir".
Bunu fövqəladə hallar naziri, general-polkovnik Kəmaləddin Heydərov deyib.
Nazir bildirib ki, digər quyularda yanğınların söndürülməsi yaxın vaxtlarda mümkün olacaq.
İtkin düşmüş neftçilərin axtarışlarının FHN və Dövlət Sərhəd Xidmətinin təyyarələri, vertolyotları və gəmiləri tərəfindən aparıldığını qeyd edən Kəmaləddin Heydərov havanın əlverişsiz olduğu günlərdə axtarış işlərinin digər texnikalarla davam etdirildiyini bildirib: "Bu günədək hələlik 6 nəfərin meyiti tapılıb. Biz axtarış zamanı başqa üsullardan da istifadə etməyə başlamışıq. Batiskaflardan istifadə edərək yaxın quyuların, estakadaların diblərinin axtarışına başlamışıq. Yanğın baş verən platformanın dibində işləmək mümkün deyil. Çünki orada soyutma işləri gedir, texnikanın ora yaxınlaşmaq imkanı yoxdur".
Nazir aparılan işlərin prezident İlham Əliyevin birbaşa nəzarətində olduğunu qeyd edib: "Hər gün prezidentə məruzə olunur. Bu, böyük təbii fəlakət idi. Təbii fəlakət nəticəsində baş vermiş texnogen qəza bizə göstərir ki, gələcəkdə daha diqqətli olmalıyıq. Xəzər dənizində belə qəzalar əvvəllər də olub. "Bulla" yatağında fontan qazın partlayışı baş vermişdi. Bundan başqa, balıqçılar itkin düşmüşdü, digər texniki qəzalar olmuşdu. FHN-də elə bir texnika yoxdur ki, bu axtarışlarda iştirak etməsin. Sadəcə hava şəraiti əlverişsizdir. 140 km/saat sürətində külək, 10 ballıq dalğalar nəticəsində bu qəza baş verib. Qəzanın ertəsi günü hava yavaş-yavaş düzəlib. Bəzi işlər görülüb. Eləcə də neftçilərin meyitləri tapılaraq çıxarılıb".
Kəmaləddin Heydərov bildirib ki, FHN-nin yarandığı 10 il ərzində həm axtarış, həm də xilasetmə üçün kifayət qədər texnika və cihaz alıb: "Bizim kənardan hansısa texnika gətirməyimizə ehtiyac yoxdur. Həmin gün bizə bir çox ölkədən, həmçinin Rusiyadan nazirlər, qurumların rəhbərləri zəng edib kömək təklif etmişdilər. Amma təklif etdikləri texnikalar bizim özümüzdə də var. Sadəcə, əlverişsiz hava şəraitinin bir neçə gün davam etməsi, güclü yanğın xilasetmə işlərinə imkan vermədi. Neftçilərin dediyinə görə, belə hadisə sonuncu dəfə 1957-ci ildə olub".
Nazir qeyd edib ki, dekabrın 4-də Neft Daşlarında güclü külək neftçilərin içində olduğu köşkü dənizə atıb və 3 nəfər itkin düşüb: "Onların da axtarışı davam etdirilir".
Kəmaləddin Heydərov bildirib ki, axtarış-xilasetmə işləri spesifik xarakter daşıyır: "Biz işlərin gedişi ilə bağlı mütəmadi əhalini məlumatlandırırıq. Çox təəssüf ki, bəzi adamlar yaranmış vəziyyətdən başqa məqsədlər üçün istifadə edirlər. Əminəm ki, nə zamansa o insanların vicdan oyananda onlar da təbii fəlakət nə demək olduğunu, bu hadisələr zamanı xilasetmə əməliyyatlarının necə, hansı şəraitdə aparıldığını anlayacaqlar. Xilasedicilər də insandır, onların da həyatı üçün təhlükə olan məqamlar olur. Əgər siz son hadisədə aparılan xilasetmə əməliyyatına baxsanız, görərsiniz ki, fədakar xilasedicilər öz həyatlarını riskə ataraq, neftçiləri qayıqdan necə sağ-salamat qurtardılar".
Nazir itkin düşmüş neftçilərin ailələrinə səbr arzulayıb.