Ceyms Uorlik: "Tərəflər danışıqlara mənfi təsir göstərə biləcək addımlardan uzaq durmalıdır"

"ATƏT-in Minsk qrupunun həmsədrləri atəşkəsə riayət edilməsi üçün tərəflərlə fəal iş aparırlar".
Bunu ATƏT Minsk qrupunun amerikalı həmsədri Ceyms Uorlik bəyan edib.
O bildirib ki, hərbi əməliyyatların azaldılması danışıqları mümkün edir. Həmsədrin sözlərinə görə, tərəflər Vyana və Sankt-Peterburq razılaşmalarının reallaşdırılması, o cümlədən ATƏT missiyasının genişləndirilməsi istiqamətində birgə fəaliyyət göstərməlidir. "Nyu-Yorkda Edvard Nalbandyan və Elmar Məmmədyarovla nizamlanmaya gətirə biləcək danışıqların davamı üçün atmosferi yaradacaq gələcək addımları müzakirə etdik", - deyə o vurğulayıb.
Həmsədrlərin yaxın zamanlarda bölgəyə səfər edəcəyini deyən Ceyms Uorlik bununla belə səfərin tarixinin hələlik müəyyənləşdirilmədiyini bildirib.
Ermənistanın yeni silahları, konkret olaraq raket komplekslərini əldə etməsinin, habelə Azərbaycanda keçirilən referendumun Dağlıq Qarabağ nizamlanmasına necə təsir edə biləcəyi ilə bağlı suala isə Ceyms Uorlik belə cavab verib: "Həmsədrlər tərəfləri danışıqlar prosesinə mənfi təsir göstərə biləcək addımlardan uzaq durmağa çağırırlar".