Rusiya Türkiyəni razı salmağa çalışır Dünya

Rusiya Türkiyəni razı salmağa çalışır

"Moskvanın qarşısına qoyduğu hədəflər Suriyanın yerlə-yeksan edilməsinə gətirib çıxaracaq"

Moskva Türkiyəyə Suriyada cüzi güzəştlər etməklə Ankaranı razı salmağa çalışır ki, Azərbaycana təsir göstərsin.
Bu sözləri açıqlamasında sabiq dövlət müşaviri Qabil Hüseynli deyib. Türkiyə Xarici İşlər naziri Mövlud Çavuşoğlunun Azərbaycana səfəri əsnasında Qarabağ məsələsi illə bağlı ümumi xarakterli bəyanatlar verməsinə, detalları bəlli olmasa da, Lavrov-Ərdoğan və Lavrov-Çavuşoğlunun Qarabağ danışıqlarını şərh edən politoloq çox önəmli məqamlara işıq salıb:
"Rusiya sanki Qarabağ probleminə dair Ermənistanla üst-üstə düşən fikirlərini Türkiyəyə də təlqin etməyə çalışır. Hazırkı proses təxminən belədir: ənənəvi Dağlıq Qarabağ qalır, onun ətrafındakı rayonlar hissə-hissə Azərbaycana geri qaytarılır və referendumla Qarabağın son statusu müəyyənləşdirilir. Ortada bir keçici status məsələsi var, hansı ki, ruslar onu da işə salıblar. Bu da 5 rayonun azad olunması müqabilində Dağlıq Qarabağa keçici statusun verilməsidir. Ancaq Azərbaycan münaqişənin yeni Madrid prinsipləri əsasında nizama salınmasını tələb edir".
Politoloq hətta Rusiyanın Türkiyəni Dağlıq Qarabağın tənzimlənməsi istiqamətində bəzi məsələlərlə bağlı razı salmağa çalışdığını da xüsusilə vurğulayıb:
"Moskva Suriyada Türkiyəyə cüzi güzəştlər etməklə Ankaranı razı salmağa çalışır ki, Azərbaycana təsir göstərsin və Dağlıq Qarabağ ətrafındakı rayonları qismən azad etməklə erməniləri qane edəcək statusu bizə qəbul etdirsin. Proses olduqca ağır bir mərhələdən keçir. Prezident İlham Əliyev buna Tərtər və Ağdam səfərində çox açıq və birmənalı cavab verdi. Ölkə rəhbərinin mövqeyi sona qədər dəyişməz olaraq qalır. Baxmayaraq ki, Rusiyanın mövqeyi tamamilə Ermənistanın tərəfindədir və eyni zamanda, Moskva Ankaraya da təsir göstərməklə Bakını müəyyən kompromislərə getməyə, Dağlıq Qarabağ məsələsində razı salmağa çalışır. Bütün səylərə rəğmən, Azərbaycan Dağlıq Qarabağ məsələsində ikinci bir erməni dövlətinin yaradılmasına imkan verməyəcək".
Q.Hüseynli Moskvanın qarşısına qoyduğu hədəflər Suriyanın yerlə-yeksan edilməsinə gətirib çıxaracağını da vurğulayıb.
Sabiq dövlət müşavirinə görə, Rusiya Suriya məsələsində Türkiyə ilə birgə hərəkət etmək barədə söylədiklərində sona qədər səmimi deyil:
"Çünki bu gün Moskvanın əsas niyyəti Türkiyəni özünün ənənəvi müttəfiqlərindən məhrum etməkdir. Rusiya bunun üçün Jirinovskidən tutmuş Karasinə qədər müxtəlif vəzifə sahiblərini işə salıb və çalışırlar ki, Türkiyəni bir növ mehvərindən çıxarsınlar. Bu gün Rusiya Suriyada hadisələrin gedişatını dəyişə bilir. Rusiyanın müəyyən təsir rıçaqları olsa da, Moskvanın qarşısına qoyduğu hədəflər Suriyanın yerlə-yeksan edilməsinə gətirib çıxarır. Düzdür, Moskva bəzi məsələlərdə Ankara üçün də yaşıl işıq yandırıb, məsələn, Suriyanın şimalında Cerablus, Əl Bab istiqamətində türkmanların yaşadığı bölgələrdə müəyyən şərait yaradıb. Bu ərazilərdə kürdlərin təsiri türk ordusu tərəfindən xeyli zəiflədilib. Ancaq məsələnin tamamilə bitdiyini söyləmək çətindir. Çünki İraqda da Kərkük türklərinin problemi var. Türkiyə isə, hələ ki, sözügedən prosesə qarışmaq fikrində deyil. Bu nöqteyi-nəzərdən vəziyyət mürəkkəb olaraq qalır".