Türkiyənin Samsun şəhərində keçirilən III Beynəlxalq Samsun İkiztepe Sağlamlıq Sammiti və Şimali Anadolu Sağlamlıq və Tibbi Sərgisi Azərbaycan və Türkiyə arasında səhiyyə, sağlamlıq turizmi və mədəni əlaqələrin inkişafı baxımından mühüm platformaya çevrilib.

Oktyabrın 15–18-də Türkiyənin Samsun şəhərində keçirilən beynəlxalq tədbirdə Azərbaycandan olan nümayəndə heyəti, turizm şirkətlərinin təmsilçiləri və media nümayəndələri iştirak ediblər. Türkiyənin ASCON şirkətinin təşkilatçılığı ilə baş tutan tədbirdə Azərbaycan nümayəndə heyətinə Azərbaycan Sağlamlıq və Termal Turizminə Dəstək Assosiasiyasının sədri Ceyhun Aşurov rəhbərlik edib.

Sammitin əsas məqsədi səhiyyə, sağlamlıq turizmi və tibbi xidmətlər sahəsində beynəlxalq əməkdaşlığı genişləndirmək, yeni tərəfdaşlıqlar qurmaq və birgə layihələrin həyata keçirilməsi üçün imkanlar yaratmaq olub.

Sammit çərçivəsində təşkil olunan B2B işgüzar görüşlərdə Azərbaycan və Türkiyə nümayəndələri arasında fikir mübadiləsi aparılıb, səhiyyə və turizm sahələrində qarşılıqlı əməkdaşlığın perspektivləri müzakirə olunub. Görüşlər yeni işgüzar əlaqələrin qurulması, təcrübə mübadiləsinin genişləndirilməsi və gələcək layihələr üçün zəmin yaradılması baxımından əhəmiyyət daşıyıb.

Azərbaycan nümayəndə heyəti səfər çərçivəsində Samsunun səhiyyə infrastrukturu ilə də yaxından tanış olub. Müasir tibbi imkanları ilə seçilən Samsun Şəhər Xəstəxanasına səfər zamanı tibbi xidmətlərin təşkili, müasir texnologiyaların tətbiqi və xəstələrə göstərilən xidmətlərin səviyyəsi barədə məlumat əldə edilib.

Bununla yanaşı, özəl tibb müəssisələrinə təşkil olunan səfərlər zamanı sağlamlıq turizmi sahəsində mövcud imkanlar öyrənilib, bu istiqamətdə əməkdaşlığın genişləndirilməsi perspektivləri nəzərdən keçirilib.

Səfər proqramının mühüm istiqamətlərindən biri də rəsmi görüşlər olub. Azərbaycan nümayəndə heyəti Samsun valisi Orhan Tavlı ilə görüşüb. Görüşdə Azərbaycan–Türkiyə münasibətlərinin inkişafı, səhiyyə və turizm sahələrində əməkdaşlığın genişləndirilməsi imkanları ətrafında fikir mübadiləsi aparılıb.

Samsun Böyükşəhər Bələdiyyəsinin sədri Halit Doğan ilə keçirilən görüşdə də qarşılıqlı əlaqələrin gücləndirilməsi və şəhərlər arasında əməkdaşlığın perspektivləri müzakirə olunub.

Samsun və Sumqayıt şəhərlərinin qardaşlaşmış şəhərlər olması bu əlaqələrin daha da inkişaf etdirilməsi üçün əlavə imkanlar yaradır. Bu çərçivədə turizm, səhiyyə, mədəniyyət və digər sahələrdə təcrübə mübadiləsinin genişləndirilməsi xüsusi əhəmiyyət daşıyır.

Sammit çərçivəsində təşkil edilən panel müzakirələrində Azərbaycan nümayəndələri də çıxış ediblər.

Azərbaycan Dövlət Turizm Agentliyinin Mədəni İrs və Regional Turizmin İnkişafı şöbəsinin Mədəni İrsin İdarə Edilməsi sektorunun müdiri Rüstəm Mehtizadə ölkəmizin mədəni irsi və turizm imkanları barədə fikirlərini bölüşüb.

Azərbaycan Sağlamlıq və Termal Turizminə Dəstək Assosiasiyasının sədri Ceyhun Aşurov isə çıxışında Azərbaycanın mineral və termal su ehtiyatlarından, bu resursların sağlamlıq turizminin inkişafında istifadəsi imkanlarından bəhs edib.

Azərbaycanın təbii resurslarının, mədəni irsinin və turizm potensialının beynəlxalq platformada təqdim olunması ölkəmizin sağlamlıq turizmi istiqamətində tanıdılması baxımından əhəmiyyətli olub.

Tədbirin sonunda Azərbaycan nümayəndə heyətinin üzvlərinə sertifikatlar təqdim edilib.

Səfər çərçivəsində nümayəndə heyətinin üzvləri Samsunun tarixi və mədəni məkanlarını, muzeylərini də ziyarət ediblər. Bu görüşlər və ziyarətlər iştirakçılara şəhərin zəngin tarixi irsi, mədəniyyəti və turizm imkanları ilə yaxından tanış olmaq fürsəti yaradıb.

Samsunda keçirilən beynəlxalq sammit və sərgi Azərbaycan ilə Türkiyə arasında səhiyyə və sağlamlıq turizmi sahələrində əməkdaşlığın genişləndirilməsi üçün yeni imkanlar açıb. İşgüzar görüşlər, rəsmi təmaslar və təcrübə mübadiləsi gələcək birgə təşəbbüslərin formalaşdırılması baxımından mühüm əhəmiyyət daşıyır.

Ümumilikdə, Samsun səfəri Azərbaycan nümayəndə heyəti üçün yalnız beynəlxalq tədbirdə iştirak deyil, həm də yeni tərəfdaşlıqların qurulması, Azərbaycanın sağlamlıq turizmi potensialının tanıdılması və iki ölkə arasında mövcud əlaqələrin daha da möhkəmləndirilməsi istiqamətində əhəmiyyətli addım olub.