Kəşfiyyat və əks-kəşfiyyat fəaliyyəti haqqında ictimaiyyətin məlumatlandırılması ilə bağlı qanunvericiliyə dəyişikliklər təklif edilir

Azərbaycanda kəşfiyyat və əks-kəşfiyyat fəaliyyəti haqqında ictimaiyyətin məlumatlandırılması ilə bağlı qanunvericiliyə dəyişikliklər təklif edilir.
Milli Məclisdən APA-ya verilən məlumata görə, bununla bağlı "Kəşfiyyat və əks-kəşfiyyat fəaliyyəti haqqında" qanunun 5-ci maddəsinə dəyişikliklər layihəsi hazırlanıb.
Layihəyə əsasən, kəşfiyyat və əks-kəşfiyyat fəaliyyəti haqqında ictimaiyyətin məlumat almaq hüququnda yeniliklər gözlənilir. Belə ki, Azərbaycan qanunvericiliyi ilə nəzərdə tutulmuş qaydada kəşfiyyat və əks-kəşfiyyat fəaliyyəti haqqında məlumatlar ictimaiyyətə, bir qayda olaraq, bu fəaliyyətin subyektlərinin yaratdığı müvafiq qurumlar vasitəsi ilə çatdırılır ki, bu qurumların qarşısında qanunvericiliyə əsasən yeni öhdəliklər qoyulması təklif olunur.
Bu qanunla və Azərbaycan Respublikasının digər normativ hüquqi aktları ilə nəzərdə tutulmuş hallarda kəşfiyyat və əks-kəşfiyyat fəaliyyətinin subyektləri fəaliyyətlərinin ayrı-ayrı istiqamətləri ilə bağlı konkret məlumatı vətəndaşlara birbaşa çatdırılmasında da yeniliklər olacaq.
Layihənin Milli Məclisdə payız sessiyasında müzakirəyə təqdim olunması planlaşdırılır.