Çinin Chang’e-6 kosmik missiyası tərəfindən Ayın qaranlıq tərəfindən geri gətirilən toz nümunələri elm dünyasını heyrətə gətirən mikroskopik bir xəzinə ortaya çıxarıb. Təhlillər nəticəsində Yerdə nadir rast gəlinən, su tərkibli meteorit növünə aid hissəciklər aşkar edilib.

Xalqcebhesi.az xəbər verir ki, Çin Elmlər Akademiyasından geokimyaçılar Jintuan Wang və Zhiming Chen-in rəhbərlik etdiyi tədqiqat qrupu, Chang’e-6 roverinin gətirdiyi 5000-dən çox toz hissəciklərini skan edərək bu tapıntılara nail olub.

Təhlil zamanı "İvuna tipli karbonlu xondritlər (CI xondritləri)" kimi tanınan, su ilə zəngin meteoritlərin mikroskopik qalıqları aşkar edilib. Bu, Ayda belə materialın ilk dəfə təsdiqlənməsidir.

"Kövrək, lakin su daşıyan" meteoritlər

CI xondritləri yüksək məsaməli və yumşaqdır, strukturlarının təxminən 20 faizi su ilə birləşmiş minerallardan ibarətdir. Bu, Yer atmosferinə daxil olduqda onları asanlıqla parçalayır. Yer üzündə tapılan meteoritlərin yalnız 1%-i bu tipə aiddir.

Ayda atmosferin olmamasına baxmayaraq, bu cür meteoritlərin yüksək çarpma sürətinə görə ümumiyyətlə buxarlanıb yox olması gözlənilirdi. Lakin Chang’e-6 nümunələri bu fraqmentlərin mikroskopik səviyyədə qorunduğunu göstərdi.

Məryəm Quliyeva