SOCAR-ın "Azneft" İstehsalat Birliyinin Qaz Anbarlarının İstismarı İdarəsində bu ilin yanvar-iyul ayları ərzində görülmüş işlər və qarşıda duran vəzifələrə həsr olunmuş texniki müşavirə keçirilib. SOCAR-dan verilən məlumata görə, müşavirədə birliyin Baş direktoru Daşqın İskəndərov Azərbaycan prezidenti İlham Əliyev tərəfindən ölkənin təbii qaza olan tələbatının davamlı təminatı və ixrac imkanlarının genişləndirilməsi məqsədi ilə yeraltı qaz anbarlarının aktiv tutumunun artırılmasına dair qoyulmuş vəzifələrin yüksək keyfiyyətlə yerinə yetirilməsi məqsədi ilə son illər yeraltı qaz anbarlarının yenidən qurulması, genişləndirilməsi istiqamətində əldə olunmuş nailiyyətlərdən danışıb, qabaqcıl texnologiyaların tətbiqi nəticəsində qazanılan uğurlardan söz açıb.
İdarə rəisi Rövşən Qarayev bu il ərzində görülmüş işlər barəsində hesabat vermiş, hazırda qış mövsümü üçün ehtiyat qazın anbarlara vurulmasının uğurla davam etdiyini bildirib. Qeyd olunub ki, avqustun 22-dək "Qaradağ" və "Qalmaz" yeraltı qaz anbarlarına 1 mlrd. 555 milyon kubmetr qaz vurulub, mövsümün sonuna kimi aktiv qazın miqdarının 3,2 mlrd. kubmetrə çatdırılması nəzərdə tutulur. Hazırda keçən mövsümdən qalıq qazla birlikdə anbarlarda aktiv qazın miqdarı 2,5 milyard kubmetr təşkil edir. İl ərzində 2 yeni quyu qazmadan istismara daxil edilib və 26 quyuda əsaslı və cari təmir işləri aparılıb.
Müşavirədə yeraltı qaz anbarlarının tutumunun artırılaraq 5 milyard kubmetrə çatdırılması üçün Qaz Anbarlarının İstismarı İdarəsi tərəfindən strateji inkişaf planının hazırlanması qərara alınıb. Strateji plana əsasən, yeni quyuların qazılması, qazılacaq quyular üçün sahələrin müəyyən olunması, yerüstü avadanlıqların yenidən qurulması və mövcud infrastrukturunun təkmilləşdirilməsi vacib hesab edilmiş, bu məqsədlə mühüm yenidənqurma və genişləndirmə işlərinin aparılacağı qeyd olunub.
Müşavirəyə yekun vuran D.İskəndərov Qaz Anbarlarının İstismarı İdarəsində görülən işlərin, ölkənin qaz təsərrüfatının yaxşılaşdırılması, qaz-nəql infrastrukturunun genişləndirilməsi sahəsində həyata keçirilən tədbirlərin bundan sonra da davam etdiriləcəyini bildirib.

Kanada şirkəti ölkəmizdə quruda neft hasilatına başlayıb
Kanadanın "Zenith Energy Ltd." şirkəti Azərbaycanın quruda yerləşən "Muradxanlı-Cəfərli-Zərdab" yataqlar blokundan saziş çərçivəsində gündəlik təxminən 300 barel ilk neftini hasil edib. "Zenith Energy Ltd." şirkəti Azərbaycanda "Zenith Aran Oil Company Ltd." müəssisəsini yaradıb. Yataqlar blokunda əməliyyatı "Zenith Aran Oil Company" və SOCAR-ın yaratdığı "Aran Oil" əməliyyat şirkəti aparır.
Xatırladaq ki, bu il martın 16-da Bakıda SOCAR və "Zenith Aran Oil Company Ltd." şirkətləri arasında "Muradxanlı", "Cəfərli" və "Zərdab" neft yataqlarının daxil olduğu blokun bərpası, kəşfiyyatı, işlənməsi və hasilatın pay bölgüsü haqqında saziş (PSA) imzalanıb. Saziş bu il iyunun 14-də Azərbaycan parlamenti tərəfindən ratifikasiya olunub. Sazişdə "Zenith" şirkəti 80%-lik, bütünlükdə SOCAR-a məxsus ortaq neft şirkəti isə 20%-lik iştirak payına malikdir. Saziş 25 il müddətində qüvvədə olacaq. Gələcəkdə bu saziş daha 5 il müddətinə də artırıla bilmək imkanı da olacaq. Yataqların ümumi sahəsi 642,4 kv. km ərazini əhatə edir.