Yanvarın 17-də Əmlak Məsələləri Dövlət Komitəsi tərəfindən növbəti hərrac keçirilib. Hər həftə keçirilən belə hərraclar fiziki və hüquqi şəxslərə istədikləri bir və ya bir neçə əmlaka bir gündə sahib olmaq şansı verir. Vətəndaşlarımız isə bu şansdan yararlanaraq aktiv şəkildə bu hərraclara qatılaraq əmlaka yiyələnirlər. Komitədən bildirilib ki, açıq və şəffaf şəraitdə keçirilən budəfəki hərracda prosesi izləmək istəyən media nümayəndələri və vətəndaşlar da iştirak edib. Həmin gün regionlarda keçirilən hərracların gedişatı da böyük monitorlar vasitəsilə canlı izlənilib.
Xatırladaq ki, özəlləşdirmənin yeni mərhələsində belə hərraclar ölkə Prezidentinin 2016-cı il 19 iyul tarixli dövlət əmlakının özəlləşdirilməsinin sürətləndirilməsi və səmərəliliyin artırılması ilə bağlı imzaladığı müvafiq Fərmana əsasən həyata keçirilir. Baş tutan bu hərracda özəlləşdirilmiş istifadəsiz qeyri-yaşayış sahələrinin 6-sı paytaxtın Səbail, Nizami və Xətai rayonlarında yerləşir. Bu obyektlərin sahəsi 15-80 kvadratmetr arasında dəyişir. Hərracda 55 min manata özəlləşdirilmiş istehsalat binasının yarımçıq tikilisi Göygöl rayonunda yerləşir. Regionlarda satılan əmlaklar sırasında 3 yanacaqdoldurma məntəqəsi də olub ki, bunlardan biri Şəkidə, digər ikisi isə Tovuzda yerləşir. Bu məntəqələr torpaq sahəsi ilə birlikdə özəlləşdirilib.
Belə hərracların rəqabətli olması da digər diqqətçəkən məqamdır. Belə ki, müxtəlif tarixlərdə təşkil olunan bir çox hərraclarda neçə-neçə qeyri-yaşayış sahəsi və ya kiçik dövlət müəssisəsinə, eləcə də səhmdar cəmiyyətləri və nəqliyyat vasitələrinə sifariş sayının çox olması hərracda rəqabətə səbəb olur. Bu isə özəlləşdirmə prosesinə və hərraclara olan marağın və bu prosesdə aktivliyin birbaşa göstəricisidir. Rəqabət isə, öz növbəsində, əmlakın dəyərini artırmaqla dövlət büdcəsinə daha çox vəsaitin daxil olmasına səbəb olur. Bu il isə intensiv özəlləşdirmə prosesində daha da böyük məbləğdə büdcəyə daxilolmalar proqnozlaşdırılır. Çünki ötən il dövlət başçısının məlum Fərmanı və Nazirlər Kabinetinin Sərəncamı ilə ümumilikdə 352 yeni dövlət müəssisə və obyekti özəlləşməyə açılıb. Bununla bağlı siyahılar komitənin internet informasiya resurslarında həm Azərbaycan, həm də ingilis dilində açıqlanıb. İl ərzində həmin əmlakların da hərrac, investisiya müsabiqəsi və ya digər özəlləşdirmə üsulları ilə dövlətsizləşdirilməsi və büdcəyə milyonlarla vəsaitin köçürülməsi nəzərdə tutulur.
Digər mühüm məqam odur ki, bu hərraclar təkcə paytaxtı deyil, bütün respublikanı əhatə edir. Yəni, eyni gündə Bakı ilə yanaşı, respublikanın müxtəlif şəhər və rayonlarında da intensiv hərraclar keçirilir. Bu isə respublika üzrə özəlləşdirmə aktivliyinin təmin olunması, regionlarda da əmlakların satışı sayəsində mülkiyyətçi təbəqəsinin artırılması, büdcə yükünün azaldılması deməkdir.
Özəlləşdirilən iri, orta və kiçik portfelli müəssisələrə, qeyri-yaşayış obyektlərinə müxtəlif həcmdə investisiyalar yatırılır. Onlar biznesə cəlb olunur və ya digər qanunla icazə verilmiş gəlir mənbələrinə çevrilir. İnvestisiyalar hesabına belə müəssisə və obyektlərin maddi-texniki bazası yenidən qurulur, yeni sistemlər və texnologiyalar tətbiq olunur, fəaliyyəti yenidən tam gücü ilə bərpa edilir və yeni iş yerləri açılır. Bu isə, öz növbəsində, ölkədəki iqtisadi aktivliyə öz müsbət təsirini göstərir.
Mühüm üstünlük isə ondan ibarətdir ki, hərracda satılmış əmlaklara qısa müddət sonra mülkiyyət hüququnun təsdiqinə dair dövlət reyestrindən çıxarış təqdim olunur. Bu isə əmlak sahibinə mülkiyyətlə bağlı hüquqi əməliyyatları tam etibarlı şəkildə və maneəsiz yerinə yetirmək imkanı yaradır. Qeyd edək ki, ƏMDK tərəfindən keçirilən hərraclar əmlak sahibi olmaq istəyən hər bir vətəndaş üçün böyük fürsətdir. Belə hərraclara qatılaraq istənilən vətəndaş əmlak sahibi ola bilər.