Azərbaycan xarici işlər naziri Elmar Məmmədyarov Lixtenşteyn Knyazlığına rəsmi səfəri çərçivəsində bu ölkənin parlamentinin sədri Albert Frik ilə görüşüb.
XİN-in mətbuat xidmətindən verilən məlumata görə, Albert Frik Azərbaycana səfərini, eləcə də Birinci Avropa Oyunlarının bağlanış mərasimində iştirakını xatırladaraq ölkəmizin dinamik inkişafını və əldə etdiyi nailiyyətləri qeyd edib.
O, Azərbaycanda idmanın sürətlə inkişaf etdiyini vurğulayaraq, yığma komandamızın Rio Olimpiya Oyunlarında əldə etdiyi yüksək nəticələri təqdirəlayiq hal kimi qiymətləndirib.
Milli Məclisin sədri Oqtay Əsədovla Strasburq şəhərində keçirdiyi görüşə və apardığı məhsuldar müzakirələrə diqqət yetirən Albert Frik ölkələrimiz arasında əlaqələrin inkişafında parlament ölçülərinin əhəmiyyətini vurğulayıb.
Elmar Məmmədyarov isə Albert Frikin ötən il ölkəmizə səfəri ilə Azərbaycan və Lixtenşteyn arasında siyasi dialoq üçün yeni imkanların yarandığını qeyd edib və əməkdaşlığın inkişaf etdirilməsi məqsədilə mövcud potensialdan istifadə edilməsinin vacibliyini vurğulayıb.
Nazir ölkəmizdə aparılan köklü iqtisadi islahatlardan, Azərbaycanın təşəbbüsü və iştirakı ilə regionda həyata keçirilən irimiqyaslı nəqliyyat və enerji layihələrdən söz açıb və iki ölkə arasında iqtisadi əməkdaşlığın inkişaf etdirilməsi üçün geniş imkanların olduğunu deyib. O, Lixtenşteyn şirkətlərini Azərbaycanda qeyri-neft sektorunda həyata keçirilən iqtisadi layihələrdə iştirak etməyə dəvət edib.
Elmar Məmmədyarov həmçinin Ermənistan-Azərbaycan münaqişəsinin həlli üzrə aparılan danışıqlar prosesi barədə məlumat verib. Nazir Ermənistan silahlı qüvvələrinin işğal olunmuş Azərbaycan ərazilərində mövcudluğunun regional sülh və təhlükəsizlik üçün əsas təhdid olduğunu qeyd edib. Elmar Məmmədyarov əlavə edib ki, qəbuledilməz və qeyri-davamlı olan "status-kvo"nu dəyişdirmək və münaqişənin həllində irəliləyişə nail olmaq üçün BMT Təhlükəsizlik Şurasının məlum qətnamələrinin tələblərinə uyğun olaraq Ermənistan qoşunlarının işğal olunmuş Azərbaycan ərazilərindən çıxarılması təmin olunmalıdır.
Görüşdə həmçinin iki ölkənin beynəlxalq təşkilatlar çərçivəsində əməkdaşlığı və parlamentlərarası əlaqələrinin genişləndirilməsinin yolları ətrafında fikir mübadiləsi aparılıb.