Bakı Təşəbbüs Qrupu ilə Burkina-Fasonun Qabaqcıl Beynəlxalq Araşdırmalar İnstitutu arasında imzalanan Anlaşma Memorandumu BTQ-nin tarixində dövlət qurumu ilə bağlanan ilk əməkdaşlıq sənədi olub.

Bunu Bakı Təşəbbüs Qrupunun (BTQ) icraçı direktoru Abbas Abbasov brifinqdə bildirib.

O qeyd edib ki, Burkina-Fasonun Xarici İşlər Nazirliyinin tabeliyində fəaliyyət göstərən Qabaqcıl Beynəlxalq Araşdırmalar İnstitutu ilə imzalanan Anlaşma Memorandumu BTQ üçün yeni mərhələnin başlanğıcıdır:

“Memorandum çərçivəsində birgə elmi tədqiqatların aparılması, hesabatların hazırlanması, təlimlərin təşkili və dekolonizasiya sahəsində əməkdaşlığın genişləndirilməsi nəzərdə tutulur”.

O bildirib ki, institut Burkina-Fasoda diplomatların hazırlanması üzrə ixtisaslaşmış dövlət qurumudur və əməkdaşlıq gələcəkdə bu sahədə yeni layihələrin həyata keçirilməsinə imkan yaradacaq:

“Təşkilat gələcəkdə digər Afrika ölkələrinin dövlət qurumları ilə də oxşar əməkdaşlıq sənədlərinin imzalanmasını nəzərdən keçirir”.