"2019-cu il Azərbaycan üçün uğurlu başlayıb. Həm neftin dünya bazarında bahalaşması, həm qeyri-neft sektorunda sənaye payının sürətlə inkişaf etməsi, həm də Prezident İlham Əliyevin son iqtisadi və sosial məsələlərlə bağlı keçirilən müşavirədə də söylədiyi kimi təkcə yanvar ayında 105 milyondan artıq vergi və gömrük rüsumlarının yığılması bu ilin ortalarında büdcəyə yenidən baxılmasına imkan verəcək". Bu fikirləri Milli Məclisin Əmək və sosial siyasət komitəsinin üzvü, deputat Musa Quliyev deyib.
O bildirib ki, büdcəyə baxılan zaman vətəndaşların sosial müdafiəsinin artırılmasına istiqamətlənə xərclərə yenidən baxıla bilər.
Dövlət büdcəsinin sosial yönümlü olduğunu deyən M.Quliyev deyib ki, büdcədə ilk yeri hərbi xərclər tutur: "Bu belə də olmalıdır. Çünki, Azərbaycanın 20 faiz torpaqları işğal altındadır. Bizim həm güclü müdafiə, həm də hücum silahlarımız olmalıdır. Bizim düşmənimizin arxasında dayanan bəzi qüvvələr onlara bəzən silahları pay və ya müəyyən kreditlərlə verir. Lakin bizim belə imkanlarımız olmadığı üçün ya silah almalı, ya da özümüz istehsal etməliyik".
Deputatın sözlərinə görə, büdcədə hərbi məsələlər üçün nəzərdə tutulan xərclərin çoxu da məhz hərbi qulluqçuların sosial vəziyyətinin yaxşılaşması üçün nəzərdə tutulub: "Hərbi xərclərimizin çoxu hərbi qulluqçularımızın yaxşı şəraitdə xidmət etməsinə imkan yaratmaq üçündür. Onların geyimləri, yeməkləri, qalacaqları yerlər, istirahətləri dövlət tərəfindən təmin olunur. Hərbçilərin ailələrinə müavinətlər verilir, müxtəlif təminatları nəzərdə tutulur. Bundan əlavə, hərbi qulluqçular dövlət tərəfindən mənzillə təmin olunur, kirayə xərcləri ödənilir. Edilən xərclərin hamısı ölkəmizin müdafiə qüdrətinin daha da artmasına xidmət edən xərclərdir".
Hərbi xərclərə ayrılan vəsaitlərin heç birinin sosial xərclərlə əlaqəsi olmadığını deyən M. Quliyev əlavə edib ki, vətəndaşlarımızın sosial müdafiəsinin gücləndirilməsinə yönələn xərclərin bundan sonra da artırılması gündəmdə olan məsələlərdəndir.