Türkiyə Fövqəladə Halların İdarə Olunması Agentliyinin (AFAD) internet saytında yer alan məlumata görə, mərkəzi Aralıq dənizi olan 5,8 bal gücündə zəlzələ qeydə alınıb.

Türkiyənin daxili işlər naziri Əli Yerlikaya sosial media hesabında etdiyi paylaşımda, "Muğlanın Marmaris şəhərində 5,8 bal gücündə zəlzələ baş verdi. Qonşu bölgələrdə də hiss edilən zəlzələ ilə bağlı AFAD və aidiyyəti qurumlarımızın bütün qrupları araşdırmalarını davam etdirir. İlkin təsbitlərə görə şəhərdə hər hansı dağıntı yoxdur. 14 yaşlı Əfranur Günlü isə zəlzələ zamanı Fethiyədə panik atak keçirərək xəstəxanaya aparıldı, lakin təəssüf ki, bütün müdaxilələrə baxmayaraq o, həyatını itirdi” deyə qeyd edib.

Zəlzələdə 69 vətəndaşın yaralandığını bildirən Ə.Yerlikaya, "Muğla və rayonlarında hündürlükdən tullanan 69 vətəndaşımızdan 14-nə yerində tibbi yardım göstərildi. 8 nəfər müalicə olunaraq evə buraxıldı. 46 vətəndaşın müayinə və müalicəsi davam edir. Həyatını itirən övladımıza Allahdan rəhmət diləyir, yaxınlarına başsağlığı verirəm. Zəlzələdən zərər çəkmiş vətəndaşlarımıza keçmiş olsun diləklərimizi bildirirəm. Allah ölkəmizi və millətimizi fəlakətlərdən qorusun” deyə vurğulayıb.