Dünən Osloda keçirilən görüşdən sonra V.Zelenski vurğuladı ki, ABŞ Ukraynaya NATO Müqaviləsinin 5-ci maddəsi ilə eyni səviyyədə olan güclü təhlükəsizlik zəmanətləri vəd edib. Ümid edirəm ki, Prezidentimiz bu maddənin mahiyyətini düzgün başa düşür. Çünki bu maddə hüquq tanısa da, Alyansa üzv dövlətlərin silahlı hücuma məruz qalmış ölkənin tərəfində birbaşa müharibəyə girməsini məcburi etmir.

Binu xalqcebhesi.az-a Ukrayna Radasının sabiq deputatı Artur Bilous deyib.

"Daha əvvəl prezidentimiz bildirmişdi ki, Putin yenidən hücum edərsə, Tramp cavab zərbəsi endirməlidir. Lakin aydındır ki, nə Tramp, nə də ABŞ-nin və ya hər hansı digər dövlətin başqa bir prezidenti belə zəmanətlər verə bilməz. ABŞ-nin İsrail və Cənubi Koreya ilə bağladığı mövcud strateji tərəfdaşlıq sazişlərində belə öhdəliklər nəzərdə tutulmayıb. İsrailə gəldikdə, Amerika müharibələr zamanı ona silah və maliyyə yardımı vasitəsilə dəstək verib. Koreyada isə ABŞ, aqressiv şimal qonşusuna qarşı çəkindirici qüvvə rolunu oynayan hərbi kontingent saxlayır. Bununla belə, KXDR müharibəyə başlayacağı təqdirdə, həmin qüvvələrin necə hərəkət edəcəyi məlum deyil" - o, deyib.

Bilousun fikrincə, buna görə də, Avro-Atlantik Xartiyasının 5-ci maddəsinə əsaslanan təhlükəsizlik zəmanətləri, Ukrayna ilə bir sıra Qərb ölkələri arasında bağlanmış ikitərəfli təhlükəsizlik müqavilələrində artıq təsbit edilmiş zəmanətlərdən mahiyyətcə fərqlənmir.

Praktikada bu o deməkdir ki, Rusiyanın yenidən təcavüzü halında, Qərb, ehtimal ki, bir daha birbaşa müharibəyə girmədən hərbi və maliyyə yardımı göstərməklə məhdudlaşacaq:

"Başa düşülməlidir ki, mütləq zəmanətlər, o cümlədən təhlükəsizliklə bağlı zəmanətlər, sadəcə mövcud deyil. Ən yaxşı halda məqsəd müharibə risklərini minimuma endirməkdir; balanslaşdırılmış siyasət buna nail olmağın açarıdır.

Bununla belə, bu halda təsir, ilk növbədə, psixoloji xarakter daşıyır. NATO həm siyasi elitamız, həm də cəmiyyətin əhəmiyyətli bir hissəsi tərəfindən hələ də bir növ fetiş, qüdrətli bir qüvvə kimi qəbul edilir. Nəticə etibarilə, təhlükəsizlik zəmanətlərinin – xüsusilə də Avroatlantik Xartiya ruhunda – hər hansı şəkildə dilə gətirilməsi bizim tərəfi qane edərdi. Bu isə hazırda Ukraynanın Alyansa üzvlüyünü nəzərdə tutmadığı üçün, nəzəri cəhətdən, rəqibimiz üçün də məqbul sayıla bilər. İşlərin necə nəticələnəcəyinə gəldikdə isə, bunu görəcəyik".

Cavid