Nazirlik bir qrup əlili sağlamlıq mərkəzinə göndərib Hadisə

Nazirlik bir qrup əlili sağlamlıq mərkəzinə göndərib

Tural

Əmək və Əhalinin Sosial Müdafiəsi Nazirliyi (ƏƏSMN) "2015-ci il üçün əlilliyi olan şəxslərin və sağlamlıq imkanları məhdud uşaqların sosial müdafiəsi və reabilitasiyası Proqramı"na uyğun olaraq, əlilliyi olan şəxslərdən daha 44 nəfərini Şəki rayonundakı istirahət və sağlamlıq mərkəzinə göndərib. Bununla da cari ilin ötən dövründə ƏƏSMN tərəfindən istirahətə göndərilən əlilliyi olan şəxslərin sayı 874 nəfərə çatıb. Əlilliyi olan şəxslərin istirahəti Lənkəran, Xaçmaz və Şəki rayonlarındakı istirahət və sağlamlıq mərkəzlərində təşkil edilir. Onlar həmin mərkəzlərə xüsusi ayrılmış nəqliyyat vasitəsilə aparılıb-gətirilir. İstirahət müddətində əlilliyi olan şəxslər üçün müxtəlif idman yarışlarının, musiqili-əyləncəli tədbirlərin təşkili, tarixi və görməli yerlərə gəzinti turları, həmçinin həmin şəxslərin fizioterapevtik müalicə prosedurlarına, müalicəvi bədən tərbiyəsinə cəlb olunması və s. tədbirlər də həyata keçirilir.
İstirahətə göndərilən əlilliyi olan şəxslər sosial cəhətdən həssas qrupların təminatının gücləndirilməsinə, həmçinin yaz-yay aylarında onların mənalı istirahəti üçün yaradılan şəraitə görə dövlətimizin başçısına minnətdarlıqlarını ifadə ediblər.