AMEA-nın yeni seçilmiş üzvlərinə diplomlar təqdim edilib Hadisə

AMEA-nın yeni seçilmiş üzvlərinə diplomlar təqdim edilib

Azərbaycan Milli Elmlər Akademiyasının (AMEA) yeni seçilmiş üzvlərinə diplomların təqdimatı mərasimi keçirilib.
APA-nın məlumatına görə, tədbirdə çıxış edən AMEA prezidenti Akif Əlizadə bildirib ki, diplom və vəsiqə ilə yanaşı, ilk dəfə olaraq Nizami Gəncəvinin şəkli həkk olunan döş nişanı akademiyanın yeni seçilmiş üzvlərinə təqdim ediləcək. A. Əlizadə qeyd edib ki, bu gün akademiyada 194 alim, 74 həqiqi üzv fəaliyyət göstərir: "Seçkilərdə isə 26 həqiqi, 50 müxbir üzv seçilib. Akademiya üzvlüyünə seçkilər gərgin keçsə də, bu sınaqdan uğurla çıxdıq. Fikrimcə, akademiyaya istedadlı alimlər seçiliblər".
A. Əlizadə qeyd edib ki, bu gün AMEA-nın resursları artmaqdadır: "Akademiyaya böyük diqqət və qayğı var. Azərbaycan çox uğurla və dinamik şəkildə inkişaf edir və Bakı dünyanın gözəl şəhərlərindən birinə çevrilib. Alimlərin əsas vəzifəsi bu dinamik inkişafın qorunub saxlanmasında iştirak etməkdir. Akademiyaya seçilən alimlər elmin və akademiyamızın inkişafına böyük təkan verməlidir".
Daha sonra yeni seçilmiş üzvlərə diplomlar təqdim olunub.